सोलापूर: काँग्रेसचे प्रदेशाध्यक्ष नाना पटोले हे रविवारी सोलापुरात आले होते. यावेळी त्यांनी एका हृदयरोगग्रस्त चिमुकलीला मुंबईला नेण्यासाठी आपले हेलिकॉप्टर देऊ केले आणि स्वत: रेल्वेने जाण्याचा निर्णय घेतला. याबद्दल त्यांचे सर्वस्तरातून कौतुक होत आहे. उंजल तुकाराम दासी (वय ४) या चिमुकलीला हृदयविकाराच्या उपचाराकरिता मुंबईला तातडीने पोहोचविणे गरजेचे होते. तिचे वडील तुकाराम दासी (रा. सुनील नगर, एमआयडीसी, सोलापूर) यांनी याबाबत आमदार प्रणिती शिंदे यांची भेट घेतली आणि मुलगी उंजल हिची हृदयविकारावरील शस्त्रक्रिया तातडीने करणे गरजेचे आहे, वाहन उपलब्ध करून देण्याची मागणी केली.

परिस्थितीचे गांभीर्य ओळखून आमदार शिंदे यांनी नाना पटोले यांना उंजल दासी हिस उपचारासाठी पाठविण्याकरीता हेलिकॉप्टर देण्याची विनंती केली. त्यानुसार नाना पटोले यांनी स्वत: रेल्वेने परत जाण्याचे ठरवून उंजल दासी हिला मुंबईला उपचाराकरीता नेण्यासाठी आपले हेलिकॉप्टर उपलब्ध करून दिले. आणि साेलापुरातील कार्यक्रम आटोपून ते रेल्वेने मुंबईकडे रवाना झाले.