मंगळवेढा(सोलापूर) : तालुक्‍यातील गुंजेगाव ते महमदाबाद शे. या दोन गावांला जोडणारा पर्यायी लोखंडी पूल धोकादायक झाला आहे. या ठिकाणी नवीन सिमेंट पुलाची मागणी बळीराजा शेतकरी संघटनेच्या वतीने करण्यात आली. 

हेही वाचाः सांगोल्यात तिसऱ्या दिवशीही जनता कर्फ्यूला शंभर टक्के प्रतिसाद ; दुकाने बंद, रस्ते ओस 

तालुक्‍याच्या पश्‍चिम भागातील या बागायत क्षेत्रांत शेतमालाची वाहतूक मोठ्या प्रमाणात होत आहे. सध्या उजनी उजव्या कालव्यावरील गुंजेगाव महमदाबाद या दोन गावांना जोडणारा लोखंडी पूल काही गंजला आहे. हा पुल कमी रुंदीचा असल्याने शेतीमालाची वाहतूक करणे, दुध संकलन करणे, शाळेसाठी विद्यार्थाची ये जा करणे अडचणीचे होत आहे. धोकादायक पुलामुळे काही वेळा किरकोळ अपघात देखील झाले आहेत. पुलाचे नूतनीकरण करणे व बंधाऱ्यातील गळतीची दुरुस्ती करण्याच्या कामाकडे संबंधित खात्याने दुर्लक्ष केल्यामुळे बळीराजा शेतकरी संघटनेच्या वतीने उपोषण करण्यात आले. 

हेही वाचाः  शहर युवक कॉंग्रेसने तुघलक उपाधी देत मोदींचा वाढदिवस बेरोजगार दिन म्हणून केला साजरा 

भीमा पाटबंधारे विभागाचे उपकार्यकारी अभियंता श्री.चव्हाण, श्री. सुरडकर व शाखा अभियंता श्री. कोळवले यांनी बळीराजा शेतकरी संघटनेच्या उपोषणकर्त्यांशी चर्चा केली. त्यानंतर महाराष्ट्‌ कृष्णा खोरे विकास महामंडळ पुणे यांच्या कार्यालयाकडून सदरचा प्रस्ताव महाराष्ट्र शासनाकडे सादर केला. प्रशासकीय मंजुरी मिळाल्यानंतर काम सुरू करण्यात येईल असे आश्‍वासन दिले होते. यावेळी बळीराजा शेतकरी संघटनेचे पश्‍चिम महाराष्ट्राचे अध्यक्ष माऊली हळणवर, जिल्हाध्यक्ष ज्ञानेश्वर जवळेकर,बिराप्पा मोठे , तालुकाध्यक्ष दामाजी मोरे, बापूसाहेब मेटकरी धनाजी गडदे अंकुश गरंडे, तानाजी सोनवणे दत्तात्रय वरपे नितीन काळे यांच्यासह बळीराजा शेतकरी संघटनेचे पदाधिकारी व या परिसरातील बहुसंख्य शेतकरी उपस्थित होते.  
 

संपादनः प्रकाश सनपूरकर