तात्या लांडगे

सोलापूर : ‘डोक्यावरील सावकाराचे कर्ज वाढले आहे, तो कर्ज परत देण्यासाठी तगादा लावत असल्यामुळे मला आत्महत्या करावी लागेल’ अशी भावनिक भीती घालून भाच्याने आत्याची जमीन लाटल्याचा प्रकार समोर आला आहे. या प्रकरणी छाया शंकर शिरसट (रा. एकता नगर, जुने वालचंद कॉलेजजवळ, सोलापूर) यांनी सदर बझार पोलिसांत फिर्याद दिली आहे. त्यावरून शरद अशोक गायकवाड (रा. वडाळा, ता. उत्तर सोलापूर) याच्याविरुद्ध गुन्हा दाखल झाला आहे.

फिर्यादी छाया शिरसट यांच्या आई-वडिलांच्या नावे वडाळा येथे १२ एकर (४ हेक्टर ८० गुंठे) जमीन आहे. त्यातील ९६ गुंठे शेतजमीन छाया शिरसट यांच्या नावावर आहे. त्यांचा भाचा शरद गायकवाड हा २४ जानेवारी २०२४ रोजी छाया शिरसट यांच्याकडे गेला. त्याने मला सावकाराचे खूप कर्ज झाले आहे, अडचणीमुळे कर्ज भरू शकत नाही पण तो सतत कर्जाच्या रकमेची मागणी करत आहे. त्याला पैसे नाही दिल्यास मला आत्महत्या करावी लागेल असे रडत रडत सांगून त्याने छाया शिरसट यांचा विश्वास संपादित केला. तुझी शेती काही दिवसांसाठी दिल्यास ती गहाण ठेवून सावकाराचे पैसे देतो म्हणून जमीन फसवून स्वत:च्या नावे करून घेतली, असेही फिर्यादीत नमूद आहे. पोलिस उपनिरीक्षक साखरे तपास करीत आहेत.

जमिनीचे १८ लाख दिल्याचेही दाखवले

भाच्याने सावकाराचे कर्ज झाल्याचे सांगून काही दिवसांसाठी जमीन गहाणखत करतो म्हणून घ्यायची म्हणून दुय्यम निबंधक कार्यालयात बोलावले. त्यावेळी त्याने फसवणूक करून स्वाक्षरी घेऊन ९६ गुंठे जमीन स्वत:च्याच नावे करून घेतली. त्याबदल्यात त्याने १८ लाख रुपयांचा मोबदला दिल्याचेही कागदोपत्री दाखविल्याचेही फिर्यादीने पोलिसांना सांगितले. आता त्या जमिनीतील ६२ गुंठे जमीन तायप्पा पडवळकर (रा. वडाळा) यांना विकून आर्थिक फायदा स्वत: मिळविल्याचेही फिर्यादीत नमूद आहे.