पंढरपूर : एक तासापूर्वी जन्माला आलेल्या पुरुष जातीच्या (Male Infant) बाळाला रस्त्याच्या मधोमध सोडून दिल्याचा धक्कादायक प्रकार पंढरपूर (Pandharpur) येथे समोर आला आहे. याप्रकरणी पोलिसांनी चार जणांना अटक केली असून, अल्पवयीन आई मुलगी, रिक्षाचालक, मुलीचा भाऊ, आई, वडील यांच्याविरोधात पंढरपूर ग्रामीण पोलीस ठाण्यात गुन्हा दाखल करण्यात आला आहे.(New Born Male Infant Found On Road)

याबाबत मिळालेल्या माहितीनुसार, पंढरपूर तालुक्यातील फुलचिंचोली रहिवासी अविनाश नागनाथ वसेकर (वय 32) शनिवारी रात्री त्यांच्या कुंटूबासह चारचाकीने देवदर्शनासाठी निघाले होते. त्यावेळी नारायण चिंचोली येथील पाण्याच्या टाकीसमोर ते आले असता त्यांना रस्त्याच्या मधोमध साधारण एक ते दोन तासांपूर्वी जन्माला आलेले नवजात पुरूष जातीचे अर्भक असल्याचे निर्दशनास आले. यानंतर संबंधित कुटुंबियांनी नवजात बाळाला उपचारासाठी म्हणून पंढरपूर येथील शितल शाह यांच्या रूग्णालयात दाखल केले. याठिकाणी बाळावर सुमारे 17 दिवसांच्या उपचारानंतर बाळाला नवरंगे बालकाश्रमात येथे देखभालीसाठी दाखल करण्यात आले आहे.

पोलिसांनी याप्रकरणाचा अधिक तपास केला असता, बाळाची आई अल्पवयीन असल्याचे उघड झाले असून, अल्पवयीन मुलीबरोबर तिघांनी वेळोवेळी शारीरिक संबंध ठेवलेही समोर आले आहे. अल्पवयीन मुलीवर अत्याचार करणाऱ्या दोघांसह चार जणांचे डी एन ए तपासण्यासाठी पुणे येथील प्रयोगशाळेत पाठवण्यात येणार असल्याची माहिती पोलीस निरीक्षक मिलिंद पाटील यांनी दिली आहे. या प्रकरणी पोलिसांनी तिघाजणांविरोधात बाललैंगिक अत्याचार प्रतिबंधक कायद्यानुसार तिघांविरुद्ध गुन्हा दाखल केला असून, किरण उर्फ भैय्या शशिकांत दावणे व दत्ता परमेश्वर खरे या दोन तरुणांना अटक केली असून आणखीन एकाच्या शोधात पोलीस आहेत.