सोलापूर ः जिल्ह्याच्या ग्रामीण भागात अक्कलकोट शहरात व तालुक्‍यात कोरोनाबाधितांची संख्या वाढत चालली आहे. आज आलेल्या अहवालामध्ये अक्कलकोट शहरातील मुजावर गल्लीत एक कोरोनाबाधित रुग्ण सापडला आहे. त्यामुळे जिल्ह्याच्या ग्रामीण भागातील बाधित रुग्णांची संख्या 149 इतकी झाली आहे. त्यामध्ये 91 पुरुष व 58 स्त्रियांचा समावेश आहे. 

जिल्ह्याच्या ग्रामीण भागात आज एकूण 12 अहवाल प्राप्त झाले. त्यापैकी 11 अहवाल निगेटिव्ह आले आहेत. मुजावर गल्ली अक्कलकोट येथील एक स्त्री पॉझिटिव्ह आढळून आली आहे. तिला सारीची लागण झाली आहे. कोरोनामुळे आतापर्यंत जिल्ह्यात 11 जणांचा मृत्यू झाला आहे. आतापर्यंत 69 जण रुग्णालयातून बरे होऊन घरी गेले आहेत. अद्यापही 69 जण रुग्णालयात उपचार घेत आहेत. जिल्ह्याच्या ग्रामीण भागात अक्कलकोट व बार्शी या दोन तालुक्‍यात प्रत्येकी 22 रुग्ण आढळून आले आहेत. तर दक्षिण सोलापूर तालुक्‍यात सर्वाधिक 68 रुग्ण आढळून आले आहेत. त्यामुळे जिल्ह्यात आतापर्यंत 149 जण कोरोना बाधित झाले आहेत.