पंढरपूर (सोलापूर) : शाळेतून मुलीला घरी परत आणण्यासाठी गेलेल्या एका विवाहित महिलेला दोन जणांनी पळवून नेले. ही घटना शनिवारी समतानगर भागात घडली. याप्रकरणी पोलिसांनी आज गुन्हा दाखल केला. 
समतानगर भागातील एक विवाहित महिला तिच्या लहान मुलीला शाळेतून घरी आणण्यासाठी गेली होती. तेव्हा तिच्या पतीशी ओळख असलेला सतीश देवकर हा तिथे आला आणि त्याने त्या महिलेची दमदाटी करून सोबत घेऊन जाण्याचा प्रयत्न केला. संबंधित महिलेने तातडीने आपल्या पतीशी संपर्क साधून घटनेची माहिती दिली. त्या महिलेचा पती तातडीने घटनास्थळी पोहोचला; परंतु तिथे संबंधित महिला नव्हती. दोन जणांनी मोटरसायकलवरून आईला पळवून नेले असल्याची माहिती मुलीने वडिलांना दिली. दोन दिवस संबंधित महिलेचा शोध घेऊन देखील तिची माहिती मिळू न शकल्याने आज त्या महिलेच्या पतीने पंढरपूर शहर पोलिस ठाण्यात फिर्याद दाखल केली.