सोलापूर : जिल्हाभरात चांगला पाऊस झाल्याने बहुतेक शेतकऱ्यांनी भाजीपाल्याची लागवड केली असून सध्या बाजारातील भाजीपाल्याचे दर स्थिर असल्याचे चित्र आहे. पण, लसणाची फोडणी महागली असून लसणासाठी एक किलोला २८५ ते ३०५ रुपये मोजावे लागत आहेत.

सोलापूर कृषी उत्पन्न बाजार समितीत पालक, टोमॅटो, शेपू, दोडका, बटाटा, कांदा, मेथी, भेंडी, हिरवी मिरची, कोथिंबीर, वांगी, कारले, गवार अशा भाजीपाल्यांचे दर शेतकऱ्यांना अपेक्षित, असे वाढलेले नाहीत. ग्राहकांना परवडतील, असे दर सोलापूर बाजार समितीत विक्री केलेल्या भाजीपाल्यांचे आहेत. पण, किरकोळ बाजारात हा दर काहीसा वाढलेला पाहायला मिळतो.

दरम्यान, आता शेतकऱ्यांची कांदा लागवडीची लगबग सुरू असून उडीद काढल्यानंतर काही शेतकऱ्यांनी भाजीपाला तर बहुतेक शेतकऱ्यांना त्याठिकाणी कांद्याचीच लागवड करायला सुरवात केली आहे. चालू हंगामात कांद्याला चांगला दर मिळेल आणि सर्व अडचणी दूर होतील, अशी शेतकऱ्यांना आशा आहे. दरम्यान, आणखी दीड-दोन महिन्यात पुन्हा भाजीपाल्याचे दर काही प्रमाणात वाढतील, अशी सद्य:स्थिती आहे.

सोलापूर बाजार समितीतील भाव

• भाजीपाला प्रतिकिलो दर

• टोमॅटो २० ते ३५ रुपये

• दोडका २२ ते ४० रुपये

• बटाटा २३ ते ३० रुपये

• वांगी २० ते ४० रुपये

• कारली २० ते ३० रुपये

• गवार ४० ते ६५ रुपये

• भेंडी १२ ते २५ रुपये

• लसूण २८५ ते ३०५ रुपये

• हिरवी मिरची १५ ते २० रुपये

• पालक ५ ते ८ रुपये पेंडी

• मेथी १३ ते २० रुपये पेंडी

• कोथिंबीर ५ ते ८ रुपये पेंडी

• शेपू ८ ते १० रुपये पेंडी

पावसामुळे कांद्याचा दर ३०० रुपयांनी घटला

मागील तीन दिवसांपासून विविध राज्यांमध्ये पाऊस पडत असल्याने सोलापूर बाजार समितीतून कांदा घेऊन मद्रास, बंगळूर याठिकाणी जाणाऱ्या गाड्या वाटेत थांबून थांबून जात आहेत. शेतमाल उतरविल्यावर तेथून यायला देखील गाड्यांना वेळ लागत आहे. त्यामुळे सोलापूर बाजार समितीत मंगळवारी (ता. २४) कांद्याचे दर प्रतिक्विंटल ३०० रुपयांनी कमी झाल्याचे पाहायला मिळाले. मंगळवारी १७७ गाड्या कांद्याची आवक होती. साडेचार ते पाच हजार रुपयांचा दर नोव्हेंबरपर्यंत राहील, असा अंदाज बाजार समितीतील अधिकाऱ्यांनी, व्यापाऱ्यांनी वर्तविला आहे. आवक वाढल्यानंतर पुन्हा डिसेंबरपासून दर कमी होवू शकतात, असेही ते म्हणाले.