उपळाई बुद्रूक (सोलापूर) : यावली ते सालसे या राज्य महामार्गाचे काम माढा शहरात सध्या सुरू असून, शहरातील मुख्य रस्ता खोदण्यात आला आहे. या रस्त्यावर महावितरणचे उभे असलेले विद्युत वाहक पोल दुसरीकडे स्थलांतरित करणे गरजेचे असताना देखील याकडे सार्वजनिक बांधकाम विभागाने दुर्लक्ष करत धोकादायकरीत्या या रस्त्याचे काम सुरू केले असून, विद्युत पोल कोसळून अपघात होण्याची दाट शक्‍यता आहे. 

हेही वाचा : गणेशोत्सवासाठी मंडळांच्या पदाधिकाऱ्यांना दिले पोलिस आयुक्तांनी "हे' निर्देश 

माढा शहरातील ग्रामीण रुग्णालय, पोलिस ठाणेसमोरील रस्त्याच्या एका बाजूचे काम सुरू आहे. या रस्त्यावर विद्युत वाहक पोल उभे असून, या पोलच्या कडेला खोदकाम करून रस्त्याचे काम सुरू आहे. या रस्त्यावर जवळपास तीन ते चार पोल उभे आहेत. या रस्त्यावर शहरातील सर्वच बॅंका, पोलिस ठाणे, ग्रामीण रुग्णालय, तहसील कार्यालयासाठी नागरिकांची मोठी वर्दळ असते. सध्या वादळी वारे व पाऊस या परिसरात सुरू असल्याने व विद्युत वाहक पोलच्या कडेने खोदकाम केल्याने हे पोल कोसळून नागरिकांच्या जीवितास धोका होण्याची दाट शक्‍यता आहे. त्यामुळे सार्वजनिक बांधकाम विभागाने तातडीने विद्युत वाहक पोल स्थलांतरित करावेत, अशी मागणी नागरिकांतून होत आहे. 

हेही वाचा : पालकांकडे नाहीत अँड्रॉइड मोबाईल! सोलापुरातील शाळेने शोधला "हा' पर्याय 

याबाबत कुर्डुवाडी सार्वजनिक बांधकाम विभागाचे शाखा अभियंता आनंद नाझरे म्हणाले, माढा शहरातील रस्त्याचे काम सुरू असताना विद्युत पोल स्थलांतरित करणे गरजेचे आहे. याबाबत कंत्राटदारांना तातडीने सूचना देऊन विद्युत पोल लवकरात लवकर स्थलांतरित करू. 

माढा नगर पंचायतीच्या नगराध्यक्षा ऍड. मीनल साठे म्हणाल्या, रस्त्यावरील विद्युत पोल स्थलांतरित करण्यासाठी संबंधित विभागाने प्रथम प्राधान्य द्यावे. जेणेकरून नागरिकांच्या जीवितास धोका निर्माण होणार नाही. त्यानंतरच रस्त्याचे काम करावे. 

संपादन : श्रीनिवास दुध्याल