Sakal Survey - उपमुख्यमंत्री अजित पवार यांचे बंड पेल्यातील वादळ ठरण्याची शक्यता गृहीत धरुन सोलापूर जिल्ह्यातील नेते व कार्यकर्ते अजूनही संभ्रमात आहेत. जिल्ह्यातील बहुतांश नेत्यांनी कुटुंबातील काही सदस्यांना थोरले काका गटात तर, काही दादा गटात पाठवून दोन्ही डगरीवर हात ठेवले आहेत.

२०१४ पूर्वी सोलापूर जिल्ह्यात विधानसभा असो की सहकार शरद पवार यांचेच वर्चस्व होते. २०१६ पर्यंत विधान परिषदेवर वर्चस्व होते. विजयसिंह मोहिते-पाटील, प्रा. लक्ष्मणराव ढोबळे, दिलीप सोपल यांना राष्ट्रवादीतून मंत्रिपदाची संधी मिळाली. पण सध्या यातील कोणीही त्यांच्या बाजूने नाही.

अजित पवारांनी २००६ मध्ये सोलापूर जिल्ह्यात आपला गट उभारण्यास सुरुवात केली. आदिनाथ साखर कारखान्याच्या निवडणुकीवेळी तेव्हा राष्ट्रवादीतच असणाऱ्या मोहिते-पाटलांवर शरसंधान करण्यासाठी बागल गटास त्यांनी मोठी ताकद दिली होती. प्रदेश प्रवक्ते उमेश पाटील यांनाही चांगली ताकद दिली.

यावेळी त्यांनी अजित पवार यांची पाठराखण केली असतानाच राजन पाटील व त्यांचे चिरंजीव विक्रांत ऊर्फ बाळराजे यांनीही अजित पवार गटात उडी घेतली हे विशेष! विधान परिषदेचे माजी आमदार दीपक साळुंके-पाटील यांनी अजित पवार तर त्यांची बहिण जिल्हा परिषदेच्या माजी अध्यक्षा जयमाला गायकवाड यांनी शरद पवार तर, राष्ट्रवादीचे जिल्हाध्यक्ष बळीराम साठे शरद पवार तर, त्यांचा मुलगा जितेंद्र साठे यांनी अजित पवार यांच्या गटात राहणे पसंत केले आहे.