सोलापूर : संभाजी तलावात वाढलेल्या जलपर्णीकडे महापालिकेचे दुर्लक्ष होत आहे. याकडे लक्ष वेधण्यासाठी संभाजी ब्रिगेडच्या पदाधिकाऱ्यांनी अंगावर जलपर्णी घालून अतिरिक्त आयुक्तांना जलपर्णीचा गुच्छ देत अनोखे आंदोलन केले. विजयपूर रोड भागातील निसर्गरम्य परिसरात असलेल्या धर्मवीर संभाजी महाराज तलावाचे संवर्धन व सुशोभीकरण होण्यासाठी गेल्या सात- आठ वर्षांपासून संभाजी ब्रिगेड पाठपुरावा करीत आहे. संभाजी तलाव सुशोभीकरण व संवर्धनासाठी केंद्र शासन आणि महाराष्ट्र शासनाच्यावतीने सहा कोटींचा निधी महापालिकेला प्राप्त झाला आहे. गेल्या पाच- सहा वर्षांपासून या तलावातील जलपर्णी व गाळ काढण्याचे काम सुरू आहे. मध्यंतरी सहा महिने जलपर्णी काढण्याचे काम एका ठेकेदाराकडून करून घेण्यात आले.

त्याला लाखो रुपये खर्च झालेला जनतेचा कररूपी पैसा वाया जात आहे. तरीही तलावातील जलपर्णीचे समूळ उच्चाटन झाले नाही. त्यातून संभाजी तलावाचे एक पर्यटनस्थळ म्हणून विकास होणे गरजेचे होते; पण या ठिकाणी महापालिका अधिकाऱ्यांचे व लोकप्रतिनिधींचे दुर्लक्ष होत असल्याने हे आंदोलन करण्यात आले. यावेळी संभाजी ब्रिगेडचे शहराध्यक्ष श्याम कदम, जिल्हाध्यक्ष संभाजीराजे भोसले, जिल्हा उपाध्यक्ष अमित जाधव, जिल्हा सचिव राहुल सावंत, जिल्हा कार्याध्यक्ष राजेंद्र माने, शहर उपाध्यक्ष सीताराम बाबर, जलपर्णी घेऊन आंदोलन करणारे संभाजी ब्रिगेडचे शहर संघटक दत्ता जाधव, श्रीकांत कोळी उपस्थित होते.