सोलापूर : कोरोनामुळे अनेक भन्नाट किस्से आता समोर येऊ लागले आहेत. असाच एक किस्सा अक्कलकोट तालुक्‍यातील बासलेगाव येथील महिलेच्या बाबतीत घडला आहे. गावातून कोणाचाही स्वॅब घेतलेला नाही, अगोदर स्वॅब घेतलेली महिला निगेटिव्ह आली तरी देखील मंगळवारी (ता. 2) रात्री सोलापूर जिल्हा प्रशासनाने जाहीर केलेल्या कोरोना रिपोर्ट मध्ये अक्कलकोट तालुक्‍यातील बसलेगाव येथील महिला कोरोना बाधित आल्याने सर्वांच्याच भुवया उंचावल्या. 

आमच्या तालुक्‍यात आमच्या गावात कोरोनाबाधित नसतानाच कोरोना बाधित रुग्ण आला कसा? असा प्रश्नच सर्वांनाच पडला होता. मंगळवारी सायंकाळी सोलापूर शहर व जिल्ह्यात वादळी वाऱ्यासह पावसाने कमी-अधिक प्रमाणात हजेरी लावली. या वाऱ्यामुळे इंटरनेट स्लो झाले, सर्व्हर डाऊन झाले. डॉ. वैशंपायन स्मृती शासकीय वैद्यकीय महाविद्यालय परिसरातील वीजपुरवठाही काही काळ खंडित झाला. त्यामुळे हा सगळा घोळ झाला आणि बसलेगावची निगेटिव्ह असलेली महिला कोरोना पॉझिटिव्ह आल्याचे समोर आले आहे. चाचणीसाठी घेतलेल्या स्वॅबला एसआरएफ नंबर दिला जातो. रिपोर्टची माहिती आरटी पीसीआर या ऍपद्वारे माहिती भरली जाते. हे ऍप आयसीएमआरला लिंक केले असल्याने कोरोना चाचणीचे नमुने, अहवाल ही सर्व माहिती आता ऑनलाइन झाली आहे. 

वादळी वाऱ्यामुळे इंटरनेट स्लो झाल्याने भरलेली माहिती सेव्ह होत नव्हती. माहिती सेव्ह होत नसल्याने अन्य एसआरएफ नंबर त्याठिकाणी टाकून पाहण्यात आला. लाइट आल्यानंतर दुसरा नंबर सेव्ह झाला आणि चुकीची माहिती जिल्हा प्रशासनाकडे सादर झाली. या एका तांत्रिक चुकीमुळे बसलेगाव येथील महिला कोरोना निगेटिव्ह असताना कागदोपत्री पॉझिटिव्ह झाली. जिल्हाधिकारी मिलिंद शंभरकर म्हणाले, तांत्रिक चुकीमुळे ही महिला कोरोना पॉझिटिव्ह आढळली असल्याचे जाहीर केले होते. ही महिला कोरोना निगेटिव्ह असून याबाबतची माहिती घेण्यात आली आहे.