सोलापूर : कोरोना (Covid-19) आता संपला... ओमिक्रॉन (Omicron) आपल्याकडे एवढ्यात काय येणार नाही... यासह अनेक भ्रमात जिल्ह्यातील तब्बल 7 लाख 29 हजार 445 जण आहेत. कोरोना लसीचा डोस (Covid Vaccine) उपलब्ध आहे परंतु लसीबद्दल असलेल्या गैरसमजामुळे जिल्ह्यातील 7 लाख 29 हजार जणांनी अद्यापही पहिला डोस घेतलाच नाही. सात लाख व्यक्तींमध्ये 18 ते 44 वयोगटातील 6 लाख 36 हजार 768 जण आहेत. कोरोनाच्या दुसऱ्या लाटेत अनेक तरुण कोरोनाच्या विळख्यात मृत्युमुखी पडल्याचा अनुभव असतानाही कोरोना लसीकरणासाठी (Vaccination) या गटातीलच व्यक्तींचे दुर्लक्ष होत आहे, ही चिंताजनक बाब आहे. (Seven million people have not yet received the first dose of the Covid vaccine)

जगातील 85 देशांमध्ये ओम्रिकॉनचा फैलाव झाला आहे. सोलापूर (Solapur) शेजारी असलेल्या लातूर (Latur) व उस्मानाबाद (Osmanabad) जिल्ह्यातही ओमिक्रॉनचे रुग्ण आढळले आहेत. ओमिक्रॉन व कोरोनाच्या तिसऱ्या लाटेपासून बचाव करण्यासाठी कोरोना लसीकरणाशिवाय पर्याय नसल्याचे प्रशासन वारंवार सांगत असतानाही सोलापुरातील तरुण मात्र कोरोना लसीकरणाकडे दुर्लक्ष करू लागले आहेत. यूकेमध्ये मागील दोन दिवसांमध्ये जवळपास तीस टक्‍क्‍याने कोरोना बाधितांची संख्या वाढत आहे. ज्या देशात कोरोना लसीकरण झाले आहे त्या देशात बाधितांची संख्या कमी झाल्याचे पाहणीतून आढळले आहे. काही महिन्यांपूर्वी कोरोनाची लस कमी प्रमाणात येत होती, त्यावेळी लस द्या म्हणून आंदोलन करणारे, निवेदन देणारे आता लस उपलब्ध असताना लस घ्या म्हणून पुढे येताना दिसत नाहीत. कोरोना लसीकरणाचा टक्का वाढविण्यासाठी मूलभूत सुविधांकरिता दुसऱ्या डोसचे प्रमाणपत्र बंधनकारक करण्याची वेळ प्रशासनावर आली आहे.

पहिला डोस न घेतलेल्यांची वयोगटानुसार संख्या

• 18 ते 44 : 6 लाख 36 हजार 768

• 45 ते 59 : 1 लाख 53 हजार 253

• 60 वर्षावरील : 61 हजार 2

• एकूण : 7 लाख 29 हजार 445

पहिला डोस न घेणारे कोणत्या तालुक्‍यातील किती

• उत्तर सोलापूर : 15 हजार 766

• दक्षिण सोलापूर : 26 हजार 129

• मोहोळ : 53 हजार 786

• मंगळवेढा : 45 हजार 604

• सांगोला : 71 हजार 233

• माढा : 52 हजार 922

• अक्कलकोट : 2 हजार 10

• करमाळा : 47 हजार 483

• माळशिरस : 1 लाख 7 हजार 858

• बार्शी : 60 हजार 340

• पंढरपूर : 91 हजार 16

• सोलापूर ग्रामीण एकूण : 5 लाख 74 हजार 147

• सोलापूर शहर : 1 लाख 55 हजार 298

कोरोनाच्या पहिल्या व दुसऱ्या लाटेतील प्रादुर्भाव सोलापूर जिल्ह्याने अनुभवला आहे. तिसऱ्या लाटेला / ओमिक्रॉनला रोखण्यासाठी कोरोना लसीकरणाशिवाय पर्याय नाही. जिल्ह्यात मुबलक लस उपलब्ध आहेत. लस घेण्यासाठी नागरिकांनी स्वत:हून पुढाकार न घेतल्यास पुढील काळात अधिक कठोर नियम करावे लागतील. 18 ते 44 वयोगटातील लसीकरण वाढविण्यासाठी प्रयत्न सुरू आहेत. या वयोगटातील व्यक्ती त्यांच्या कुटुंबातील कर्ता व्यक्ती मानला जाते. स्वत:च्या व कुटुंबाच्या सुरक्षिततेसाठी तरी किमान या वयोगटातील नागरिकांनी लसीकरणासाठी पुढाकार घ्यावा.

- मिलिंद शंभरकर (Milind Shambharkar), जिल्हाधिकारी