सोलापूर : रत्नागिरी ते सोलापूर या चौपदरी राष्ट्रीय महामार्गाचे काम युद्धपातळीवर सुरू आहे. सोलापुरातील भय्या चौक परिसरात उड्डाणपूल होणार असून, त्यासाठी एनजी मिलची जागा लागणार आहे. त्यासाठी महापालिकेने महाराष्ट्र वस्त्रोद्योग महामंडळाकडे मागणी केली असून, महामंडळाने त्यास तत्त्वत: मान्यता दिली आहे. कब्जा पावती मिळाल्यानंतर उड्डाणपुलाचे काम सुरू होणार आहे. या महामार्गासाठी साडेसहा हजार कोटी रुपये मंजूर असून, काम पूर्ण होण्यासाठी केंद्रीय वाहतूक मंत्रालयाने एप्रिल 2021 पर्यंत मुदत दिली आहे. 

हेही वाचा : पाच रुपयांसाठी झाला होता अपमान; 2000 रुपये उसने घेऊन बचत गटाच्या माध्यमातून थाटली "या' रणरागिणीने लाखोंच्या उलाढालीची कंपनी ! 

राज्यातील सोलापूर, सांगली, कोल्हापूर आणि रत्नागिरी या चार जिल्ह्यांना जोडणाऱ्या महत्त्वपूर्ण नव्या महामार्गाचे काम युद्धपातळीवर सुरू आहे. कोरोना काळात लॉकडाउन असतानाही या महामार्गाचे काम टप्प्या-टप्प्याने सुरूच आहे. केंद्रीय मंत्री नितीन गडकरी यांच्या पुढाकारातून हा महामार्ग मंजूर झाला आहे. सोलापूर जिल्ह्यात सांगलीपर्यंत 56 किलोमीटरचा रस्ता आहे. या महामार्गासाठी चार हजार कोटींचा खर्च अपेक्षित आहे. तर भूसंपादनासाठी दोन हजार 500 कोटींचा खर्च झाला आहे. दरम्यान, सोलापुरातील भय्या चौक परिसरात मोठा उड्डाणपूल होणार आहे. मात्र, महाराष्ट्र राज्य वस्त्रोद्योग महामंडळाच्या ताब्यात एनजी मिलची जागा आहे. राष्ट्रीय रस्ते विकास महामंडळाने महापालिकेच्या माध्यमातून ती जागा मागितली आहे. या पार्श्‍वभूमीवर महापालिकेने वस्त्रोद्योग महामंडळाकडे जागेची मागणी केल्यानंतर त्यास तत्त्वत: मान्यता मिळाली आहे. कब्जा पावती मिळाल्यानंतर ती जागा उड्डाण पुलासाठी दिली जाईल, अशी माहिती नगर रचनेचे सहायक संचालक लक्ष्मण चलवादी यांनी दिली. 

हेही वाचा : सोलापूर विभागातील "या' आठ रेल्वे स्थानकांना "आयएसओ' मानांकन ! 

ठळक बाबी... 

• सोलापूर-रत्नागिरी महामार्ग एप्रिल 2021 पर्यंत पूर्ण होईल 
• वस्त्रोद्योग महामंडळाकडून एनजी मिलची जागा मिळाल्यानंतर होणार भय्या चौकात उड्डाणपूल 
• चौपदरी महामार्गासाठी साडेसहा हजार कोटींचा खर्च 
• सोलापूर, सांगली, कोल्हापूर आणि रत्नागिरी या चार जिल्ह्यांना जोडणार हा महामार्ग 

याबाबत राष्ट्रीय रस्ते विकास प्राधिकरणाचे प्रकल्प संचालक संजय कदम म्हणाले, सोलापूर-रत्नागिरी हा महामार्ग एप्रिल 2021 पर्यंत पूर्ण होईल. लॉकडाउन असतानाही महामार्गाचे काम सुरू असून मुदतीत काम पूर्ण करण्याचा प्रयत्न आहे. महामार्ग पूर्ण झाल्यानंतर वाहतूक सुरळीत होईल. 

संपादन : श्रीनिवास दुध्याल