अक्कलकोट - अक्कलकोट एसटी बस स्थानकामागील एसटी महामंडळाच्या जागेवरील अतिक्रमण आज (शनिवारी) हटविण्यात आले. पोलिस बंदोबस्तामध्ये एसटी महामंडळ, जागा मोजणी कार्यालय व अक्कलकोट तहसील कार्यालय यांच्या संयुक्त विद्यमाने ही कारवाई झाली. अतिक्रमणधारकांनीही सहकार्याची भूमिका घेतल्यामुळे संघर्ष टळला अन्‌ बसस्थानक परिसर अतिक्रमणमुक्त झाला.

अक्कलकोट एसटी बसस्थानकामागील एसटीच्या मालकीच्या असलेल्या जागेवर काही जणांनी अतिक्रमण करून छोटी- छोटी दुकाने व पत्र्याचे शेड मारलेले होते. एसटी महामंडळाचे आगारप्रमुख एम. बी. जुनेदी, अक्कलकोटचे तहसीलदार बाळासाहेब शिरसाट व मोजणी कार्यालयाचे श्री. बिराजदार यांनी मोजणी करून एसटी महामंडळाच्या जागेची हद्द निश्चित केली.

एसटी महामंडळाच्या हद्दीच्या आत असलेले पत्रा शेडचे अतिक्रमण काढण्याबाबत तहसीलदार बाळासाहेब शिरसाट, एसटी महामंडळाचे आगार प्रमुख जुनेदी व अक्कलकोट उत्तर पोलिस ठाण्याचे निरीक्षक जितेंद्र कोळी यांनी अतिक्रमणधारकांशी चर्चा करून त्यांना समजावून सांगितले. अतिक्रमणधारकांनीही प्रशासनास सहकार्य करून अतिक्रमण काढण्यास सहकार्य केल्याचे तहसीलदार शिरसाट व पोलिस निरीक्षक जितेंद्र कोळी यांनी सांगितले.

अतिक्रमण काढत असताना एसटी महामंडळाचे कर्मचारी, नागरिक व पोलिसांची मोठ्या प्रमाणात गर्दी झाली होती. याप्रसंगी पोलिस उपनिरीक्षक मोरे यांच्यासह पोलिसांचा मोठा फौजफाटा उपस्थित होता.

बारा पत्राशेड हटविले

सकाळी अकरापासून अतिक्रमण काढण्याची कारवाई सुरू होती. यामध्ये दहा ते बारा पत्राशेड हटविण्यात आले. तसेच एका बाजूला असलेल्या टेकडीवर अतिक्रमण सतत होत असल्याने ती टेकडी लेव्हल करण्यात आली. तसेच एक-दोघांना अतिक्रमण काढण्यास दोन दिवसांची मुदत दिल्याचे सांगण्यात आले.