सोलापूर : श्री सिद्धेश्वर सहकारी साखर कारखान्याच्या को-जनरेशनच्या अनधिकृत चिमणीच्या बांधकाम परवानगीबाबत महापालिकेने ४७८ (२) ची नोटीस बजावली आहे. या नोटिसीवर उच्च न्यायालयाने दिलेल्या आदेशानुसार कारखान्याच्या परवानगी प्रस्तावावर ४ जुलै रोजी सुनावणी होणार असल्याची माहिती आयुक्त पी. शिवशंकर यांनी दिली. यावेळी विमान प्राधिकरणाची ‘एनओसी’ तपासली जाणार अहे.

सिद्धेश्वर कारखान्याने नव्याने २०१४ मध्ये को-जनरेशनची चिमणी महापालिकेच्या परवानगीविना उभारली. कारखान्याची पूर्वीची चिमणी ही ५२ मीटर उंचीची होती. त्यामुळे २०१२ मध्ये किंगफिशरची प्रवासी विमानसेवा अडथळ्याविना सुरू होती. सोलापुरातून अपेक्षित प्रवासी उपलब्ध न झाल्याने ती सेवा बंद करण्यात आली. दरम्यान, कारखान्याने विनापरवानगीने ९१ मीटर उंचीची को- जनरेशन चिमणी उभारली. याबाबत ना महापालिकेची परवानगी घेतली ना विमान प्राधिकरणाची. उड्डाण योजनेंतर्गत विमानसेवा सुरू करण्याच्या हालचाली सुरू झाल्यानंतर विमान प्राधिकरणाकडून पाहणी झाली.

यामध्ये चिमणीच्या उंचीसह १८ त्रुटी प्राधिकरणाने काढल्या. त्यावेळी कारखान्याने महापालिकेकडे बांधकाम परवानगीचा प्रस्ताव दिला. परंतु विमान प्राधिकरणाच्या एनओसीशिवाय महापालिकेने परवानगी न दिल्याने कारखान्याने २०१९ मध्ये विमान प्राधिकरणाकडे प्रस्ताव दिला होता. एनटीपीसीच्या चिमणीनुसार कारखान्याच्या चिमणीला परवानगी देण्याची मागणी कारखान्याने केली होती. मात्र, कोणतेही कारण न देता दिल्लीच्या विमान प्राधिकरणाने ही परवानगी नाकारली होती. महापालिकेने अनधिकृत बांधकाम प्रकरणी ४७८ (२) च्या नोटिसीनुसार चिमणीचे पाडकाम हाती घेतले होते. आता पुन्हा या प्रकरणावर विमान प्राधिकरणाने पुन्हा सुनावणी घेऊन निकाल द्यावा, असा आदेश उच्च न्यायालयाने दिला.