सोलापूर : माध्यमिक शिक्षण विभागातून शाळांच्या टप्पा अनुदान कार्यवाहीच्या तब्बल सात आवक-जावक नोंदवह्या गहाळ झाल्या आहेत. त्यामुळे अनेक शिक्षकांकडे शिक्षणाधिकाऱ्यांच्या मान्यतेचे आदेश आहेत, पण त्यांचे रेकॉर्ड शिक्षण विभागात आढळत नाही. या प्रकरणी आता सदर बझार पोलिसांत गुन्हा दाखल झाला असून पोलिसांनी तत्कालीन पाच शिक्षणाधिकाऱ्यांसह तीन लिपिकांची सध्याची माहिती मागविली आहे.

सोलापूरच्या माध्यमिक शिक्षण विभागाचे तत्कालीन शिक्षणाधिकारी भास्करराव बाबर, सुलभा वठारे, विद्या शिंदे, जावेद शेख, जे. एस. शिवशरण यांच्यासह कार्यालयातील सुरेश देवकर, राजेंद्र सोनकांबळे व मुदस्सर शिरवळ या लिपिकांवर सदर बझार पोलिसांत गुन्हा दाखल झाला आहे. उपशिक्षणाधिकारी महारुद्र नाळे यांनी या प्रकरणी पोलिसांत फिर्याद दिली होती. पोलिस उपनिरीक्षक शशिकांत लोंढे यांच्याकडे या प्रकरणाचा तपास सोपविण्यात आला आहे.

दरम्यान, पोलिसांनी संशयित आरोपींना त्यांच्या कार्यालयातून गहाळ नोंदवह्या शोधून आम्हाला द्याव्यात, असे आवाहन केले आहे. संशयित आरोपींना पोलिसांनी अद्याप नोटीस बजावलेल्या नाहीत. प्राथमिक तपासानंतर पोलिस पुन्हा संशयितांवर ठोस कारवाई करतील. तुर्तास पोलिसांनी संशयित आरोपींचा विद्यमान पत्ता, पदनाम, संपर्क क्रमांक या बाबींची माहिती माध्यमिक शिक्षण विभागाच्या कार्यालयाकडून मागविली आहे.

आता गहाळ झालेल्या नोंदवह्या सापडेपर्यंत सर्व संशयित चौकशीच्या फेऱ्यात असणार आहेत. दरम्यान, नोंदवह्या गहाळ झाल्याप्रकरणी गुन्हा दाखल झाल्याने २९८ शिक्षकांच्या शालार्थ आयडीसंदर्भातील कार्यवाही शिक्षण उपसंचालक कार्यालयाकडून सुरु झाली आहे.

...तर संशतियांच्या अडचणी वाढू शकतात

माध्यमिक शिक्षण विभागातील आवक-जावक नोंदवह्या न सापडल्यास संबंधितांना चौकशीच्या अनुषंगाने पोलिसांकडून नोटीस बजावली जाईल. प्रत्येकाचा स्वतंत्रपणे जबाब नोंदवून पुढील कारवाई होणार आहे. त्यानंतर संशयितांनी अटकपूर्व जामिनासाठी अर्ज केला, तरीदेखील मुद्देमाल पोलिसांना न मिळाल्याने त्यांना न्यायालयातून जामीन देखील मिळणे कठीण होईल, असे कायदेतज्ज्ञांनी ‘सकाळ’शी बोलताना सांगितले.