सोलापूर : सोलापूर शहर व जिल्ह्यातील कोरोना बाधित रुग्णांची संख्या दिवसेंदिवस वाढत असताना आज आरोग्य विभाग व जिल्हा प्रशासन यांच्यातील गंभीर प्रकार सर्वांच्या समोर आला. चौदा दिवसाचा कालावधी पूर्ण झाला म्हणून एका व्यक्तीला सोलापुरातील कोंतम चौकापर्यंत सोडण्यातही आले. त्याला सोडुन रुग्णवाहिका परत गेली. तो घरात जायच्या आतच त्याला फोन आला आणि तुम्ही कोरोना पॉझिटिव्ह आहात असा निरोप मिळाला. अवघ्या काही मिनिटांमध्ये निगेटिव्ह असलेला व्यक्ती पॉझिटिव झाल्याने कोरोना विरुद्धच्या लढाईतील हा सावळा गोंधळ समोर आला.

 जिल्हा प्रशासन व आरोग्य विभागात विभागाच्या या प्रकारामुळे दिवसभर सोशल मीडियावर विविध चर्चा रंगत होत्या. सोलापुरातील पहिला कोरोना बाधित आणि कोरोनाचा पहिला बळी ज्या तेलंगी पाछा पेठ परिसरात ठरला, त्या परिसरातील मृत किराणा दुकानदाराच्या संपर्कात आलेल्या एका व्यक्तीला तपासणीसाठी ताब्यात घेण्यात आले होते. 14 दिवसांसाठी त्याला क्वारंटाइन  करण्यात आले होते. तीन दिवसांपूर्वी त्या व्यक्तीची कोरोना चाचणी करण्यात आली. तो व्यक्ती निगेटिव्ह आला आहे असे समजून त्याला त्याच्या घरापर्यंत सोडण्यासाठी रुग्णवाहिका आली. तो व्यक्ती घरात जाण्यापूर्वीच त्याचा फोन खणाणला आणि तुमचा रिपोर्ट कोरोना पॉझिटिव आला आहे, तुम्हाला घेऊन जायचे आहे असा निरोप मिळाला. काही वेळात ॲम्बुलन्स आली आणि त्या व्यक्तीला पुढील उपचारासाठी दवाखान्यात घेऊन गेली.

राज्यस्तरावर प्रसिद्ध झालेली ती आकडेवारी चुकीची
सोलापुरात कोरोना रुग्णांची संख्या मंगळवारी जिल्हा प्रशासनाच्यावतीने 68 जाहीर करण्यात आली होती. त्यापैकी सहा जणांचा मृत्यू झाला आहे आणि उर्वरित व्यक्तींवर सोलापुरात उपचार सुरू आहेत असे असताना सोलापुरात 82 कोरोना बाधित असल्याची आकडेवारी राज्याच्या एकात्मिक रोग सर्वेक्षण कार्यक्रमाने प्रसिद्ध केली आहे. राज्याच्यावतीने प्रसिद्ध झालेली  आकडेवारी चुकीची असल्याची माहिती सोलापूरचे जिल्हाधिकारी मिलिंद शंभरकर यांनी दिली.आरोग्य विभागाच्या संचालिका अर्चना पाटील यांच्याशी माझे बोलणे झाले असून ही आकडेवारी दुरुस्त करण्याबाबत मी त्यांना सांगितले असल्याचेही जिल्हाधिकारी शंभरकर यांनी सांगितले. राज्याच्या आकडेवारीत  सोलापूर शहरात 75 आणि ग्रामीण भागात सात असे 82 रुग्ण दाखविण्यात आले आहेत. पाच जण मृत्यू पावले असल्याचीही नोंद या आकडेवारीत आहे.