Solapur - सोलापूरचा रहिवासी असलेला आदित्य कोंडमूर हा तरुण जादूच्या कलेचे शिक्षण घेत आहे. त्यासोबत त्याला कार्ड फेकण्याच्या छंदाने जागतिक विक्रमाकडे लक्ष वेधले. त्याने यापूर्वी पत्ते फेकण्याबाबतचे दोन जागतिक विक्रम नोंदवले आहेत. त्याने यापूर्वी ११७ पत्ते एका लक्ष्याच्या दिशेने सर्वाधिक संख्येने फेकण्याचा विक्रम गिनीज बुकात नोंदवला. त्यानंतर त्याने ११७ पत्ते सर्वाधिक अचूक पद्धतीने लक्ष्याच्या दिशेने फेकण्याचा विक्रम केला.

त्यानंतर त्याने विजयपूर येथे मानवी लक्ष्याच्या दिशेने एका मिनिटात सर्वाधिक पत्ते फेकण्याचा विक्रम केला. त्याने ६६ पत्ते मानवी लक्ष्याभोवती फेकण्याचा विक्रम केला. त्याने हा विक्रम करताना या पूर्वीचा सर्वात जास्त पत्ते फेकण्याचा जागतिक विक्रम मोडला आहे. त्याने हा विक्रम कर्नाटकातील विजयपुरा येथील उदयश्री स्पोर्ट्स अकादमीमध्ये केला होता.

या विक्रमाची नोंद घेत गिनीज बुक ऑफ वर्ल्ड रेकार्डसने मंगळवारी (ता.२) सन्मानपत्र पाठवून ही घोषणा केली आहे. यापूर्वीचा विक्रम हा युएसएच्या रिक स्मिथ ज्युनिअरच्या नावाने आहे जो की, ५६ पत्त्याचा होता. आता आदित्य कोंडमूरचा विक्रम गिनीज बूकमध्ये नोंदवला गेला आहे. गिनीज बूकने त्यास नव्या विक्रमाच्या नोंदीचे सन्मानचिन्ह पाठवून त्याचा गौरव केला आहे.