सोलापूर : महापालिका विभागीय कार्यालयांच्या बैठकीत नगरसेवकांएेवजी त्यांचे स्वीय सहायक आणि नगरसेविकांचे पती, भाऊ, मुलांचे वर्चस्व दिसून आले. नगरसेवकांनी चर्चेत सहभागी होण्याएेवजी इतरांनीच प्रश्न उपस्थित केले. 

विभागीय कार्यालयांमध्ये बैठका 
नगरसेवकांच्या अडचणी समजून घेण्यासाठी महापौर श्रीकांचना यन्नम यांनी मंगळवारपासून विभागीय कार्यालयांत बैठका घेण्यास सुरुवात केली आहे. आज विभागीय कार्यालय क्रमांक एक आणि दोनमध्ये बैठका झाल्या. सभागृह नेते श्रीनिवास करली व आयुक्त दीपक तावरे यांच्यासह अधिकारी उपस्थित होते. 

हेही वाचा - या महापालिकेत येणार हा पहिल्यांदाच प्रसंग 

पती, मुलांचा सहभाग 
या बैठकांमध्ये नगरसेविकांएेवजी त्यांच्या पतींनीच चर्चेत सहभाग घेतला. त्यामुळे लोकांनी निवडून दिलेल्या नगरसेविकांना आपल्या प्रभागातील समस्यांची माहिती नाही का असा प्रश्न उपस्थित होत आहे. दरम्यान, नगरसेवक पतींच्या भूमिकेचे सभागृह नेते श्रीनिवास करली यांनी समर्थन केले आहे. प्रभागातील कामे करण्यामध्ये नगरसेविकांचे पती किंवा त्यांचा मुलगा किंवा त्यांचे सहायक अधिकार्यांच्या संपर्कात असतात. त्यामुळे प्रभागातील अडचणींची माहिती त्यांना माहिती असते. ती माहिती उपस्थित अधिकाऱ्यांना व्हावी म्हणून ते सहभागी होतात, असे श्री. करली यांनी सांगितले. 

हेही आवर्जून वाचा - पंडीत भीमसेन जोशी आणि सोलापूर 

वर्षानु वर्षे सुरु आहे प्रकार 
सोलापूर महापालिकेतील पतीराज, भाऊ, मुलगा हेच खरे कारभारी हा प्रकार नवीन नाही. यापूर्वीही अनेक वर्षांपासूनचा हा अनुभव आहे. दहा वर्षांपूर्वी एका नगरसेविकाच पती स्वतःच नगरसेवक असल्याच्या थाटात बोलायचा. मी मेंबर बोलतोय असे उघडपणे सांगायचा. अधिकारीही त्यास बोला मेंबर म्हणून संबोधायचा. हा प्रकार सर्रास सुरु आहे. एकीकडे सावित्रीबाई फुलेंचे गुणगान करायचे आणि दुसरीकडे पत्नीला सक्षम होऊ द्यायचे नाही असा प्रकार गेल्या अनेक वर्षांपासून महापालिकेत उघडपणे सुरु आहे.