मंगळवेढा सकाळ वृत्तसेवा शहरातील अवजड वाहतूक बंद करण्याबाबत आदेश असताना देखील बंदीचा नियम मोडून शहरात प्रवेश केलेल्या अवजड वाहनधारकाचा येथील शहरानजीक असलेल्या चोखोमेळा नगर ग्रामस्थांनी गांधीगिरी करत सत्कार केला.

शहरामध्ये आलेल्या अवजड वाहतुकीमुळे 12 पेक्षा अधिक नागरिकांचा अपघाती मृत्यू झाला.तर यामध्ये अनेक जण जखमी देखील झाले. अशा परिस्थितीत ही अवजड वाहतूक बंद करावी अशी मागणी नागरिकांकडून वारंवार केली.

परंतु प्रशासनाने याकडे सोयीस्करित्या दुर्लक्ष केले.परंतु शिवसेनेचे नारायण गोवे व वारी परिवाराच्या सदस्याने यामध्ये सातत्याने पाठपुरावा केला. आ.समाधान आवताडे यांनी पंचायत समितीच्या सभागृहात घेतलेल्या स्वयंसेवी संस्थाच्या बैठकीत देखील अवजड वाहतुकीचा मुद्दा प्रकर्षाने गाजला होता

. त्यानंतर सद्गुरु बैठकीसाठी जाणाऱ्या एका महिलेला अवजड वाहनाने चिरडले त्यामध्ये तिचा जागीच मृत्यू झाला. या घटनेनंतर नागरिकांनी या मार्गावर रास्ता रोको आंदोलन करत अवजड वाहतूक बंद केल्याशिवाय आंदोलन थांबवणार नसल्याचा पवित्रा घेतला.

त्यानंतर काही वेळात प्रशासनाने याबाबत हालचाली करत पंढरपूर रोडवर साडेचार मीटर उंचीची कमान उभा करण्यास सुरुवात केली. हे काम पूर्ण होण्यास अजून बराच अवधी आहे असला तरी सध्या अवजड वाहतूक करणाय्रा वाहनधारकाने आपले नेण्याचा प्रयत्न केला दरम्यान जागृत असलेल्या ग्रामस्थांनी त्याला हटकले व अपघातामुळे शहरातील जड वाहतूक बंद करण्यात आली आहे.

त्यामुळे आपण इथून वाहन नेऊ नये असे विनंती करत त्या वाहनधारकाचा गांधीगिरी करत सत्कार केला व परत पाठवून पर्यायी मार्गाने जाण्याचे सूचना केल्या. यावेळी शंकर गांडोळे,सुहास पवार, संभाजी नागणे, अभिराज जावळेकर, दत्ता देशमुख, शिवाजी जगदाळे, अमित सावंत, सुरेश पाटील, कृष्णा ओमने उपस्थित होते.