सोलापूर: खासगीकरणाविरोधात मुंबई येथील आझाद मैदानावर परिचारिकांच्या वतीने तीनदिवसीय धरणे आंदोलन करण्यात आले. यानंतर २६ व २७ मे रोजी काम बंद आंदोलन झाले. मात्र यावर तोडगा निघाला नसल्यामुळे उद्या (शनिवार) पासून बेमुदत काम बंद आंदोलन करणार असल्याची माहिती राज्याध्यक्षा डॉ. मनीषा शिंदे यांनी ‘सकाळ’शी बोलताना दिली.

ाशासनाने कंत्राटी पद्धतीने परचारिकांची पदे भारण्यास मान्यता दिली आहे, ती रद्द करावी, अशी मागणी महाराष्ट्र राज्य परिचारिका संघटनेने सरकारकडे केली आहे. यापूर्वीही शासनाने परिचारिकांनी केलेल्या राज्यव्यापी आंदोलनानंतर मागण्या तात्पुरत्या स्वरूपात मान्य केल्याचे आश्वासन दिले होते. मात्र आश्वासनाकडे शासनाने दुर्लक्ष केले. आता लेखी आश्वासनानंतरच कामावर परत येण्याचा निर्णय घेतला असून, जोपर्यंत ठोस निर्णय होणार नाही, तोपर्यंत एकही परिचारिका कामावर हजर होणार नसल्याचे राज्य परिचारिका संघटनेच्या पदाधिकाऱ्यांनी व डॉ. शिंदे यांनी बोलताना सांगितले. या आंदोलनात आशा माने, शशिकांत साळवे, वीरेश महाजनी, मीरा सर्वगोड, संध्या जाधव, संध्या गावडे, आशा कसबे, आशा वाघमोडे यांच्यासह विमा हॉस्पिटल, छत्रपती शिवाजी महाराज सर्वोपचार रुग्णालय, सिव्हिल हॉस्पिटल आदी रुग्णालयांतील ४०० परिचारिकांचा समावेश होता.

आम्ही राज्याच्या आरोग्यमंत्र्यांशी चर्चा केली, मात्र त्यांच्याकडून ठोस असा कोणताही निर्णय झाला नाही. त्यामुळे जोपर्यंत न्याय मिळणार नाही तोपर्यंत हा लढा सुरूच राहणार आहे. २८ मेपासून बेमुदत काम बंद आंदोलन केले जाणार आहे.

- डॉ. मनीषा शिंदे, राज्याध्यक्षा, महाराष्ट्र राज्य परिचारिका संघटना

परिचारिकांच्या प्रमुख मागण्या...

• केंद्र शासनाप्रमाणे वेतनवाढ देण्यात यावी

• केद्र शासनाप्रमाणे राज्यातील परिचारिकांनाही गणवेश भत्ता मिळावा

• पदोन्नती, पदनिर्मिती व पदभरती कंत्राटी पद्धतीने न करता कायमस्वरूपी पदभरती करावी

• परिचारिकांना केंद्र शासनाप्रमाणे नर्सिंग भत्ता नव्याने मंजूर करावा

• कर्मचाऱ्यांच्या नियोजित विनंती बदल्या नियमित कराव्यात

• शैक्षणिक पात्रतेनुसार कर्तव्य व जबाबदाऱ्या द्याव्यात