सोलापूर : सोलापूर-पुणे-सोलापूर धावणाऱ्या हुतात्मा एक्स्प्रेसचा एक जनरल तर एक स्लीपर कोच कमी करण्यात आला आहे. यामुळे सर्वसामान्य प्रवाशांना अद्यापही आरक्षण करून प्रवास करावा लागत आहे. आरक्षण करुन प्रवास करणे सामान्य प्रवाशांना परवडत नसल्याने त्यांना आर्थिक भुर्दंड सहन करावा लागत आहे. जनरल डबे नसल्याने खिशाला कात्री लागत आहे. यामुळे जनरल डबे जोडावे, अशी मागणी प्रवासी संघटनेच्यावतीने जोर धरू लागली आहे.

गेल्या एकवीस वर्षांपासून पुणे-सोलापूरच्या प्रवाशांच्या सेवेत कार्यरत असलेल्या हुतात्मा एक्स्प्रेसला कोरोनापूर्वी दोन जनरल डबे होते. कोरोना काळात वाहतुकीची सर्व साधने बंद होती. मात्र कोरोनाचा प्रादुर्भाव ओसरताच हळूहळू वाहतूक पूर्वपदावर आली. जनरल डबे असल्याने प्रवाशांना जनरल तिकीटावर प्रवास करता येत होता. मात्र कोरोनानंतर जनरल डबे काढण्यात आल्याने तिकीट देखील मिळत नसल्याने सामान्य प्रवाशांचे हाल होत आहेत. जलद सेवेसाठी हुतात्मा एक्स्प्रेस या मार्गावरील महत्त्वाची गाडी मानली जाते.

एक्सप्रेस सोलापूरहून सकाळी साडेसहा सुटते. ती पुणे स्थानकात सकाळी साडेदहा वाजता दाखल होते. ती गाडी पुण्याहून सायंकाळी सहा वाजून १० मिनिटांनी सुटते. ती सोलापूरला रात्री १०.१५ वाजता पोहचते. प्रवाशांची वाढलेली संख्या व बदलेला काळ यामुळे या गाडीला जनरल डबे जोडावे, अशी मागणी रेल्वे संघटनेच्या वतीने करण्यात येत आहे.

हुतात्मा एक्सप्रेसला कोरोनापूर्वी उपलब्ध असलेले अनारक्षित एक कोच व द्वितीय श्रेणी शयनयान (स्लिपर क्लास)चा एक कोच पूर्ववत जोडावा. प्रवाशांची होणारी गैरसोय प्रशासनाने दूर करावी.

- संजय पाटील, अध्यक्ष, प्रवासी सेवा संघ, सोलापूर

हुतात्मा एक्सप्रेसपुढे पुणे-भुसावळ जात असल्याने पूर्वीप्रमाणे एक स्लीपर आणि एक जनरल डबा जोडावा. हुतात्माचे जनरल तिकीट बंद असल्याने ऐन वेळेस जाणाऱ्या प्रवाशांची गैरसोय होत आहे.

- पियूष संगापूरकर, प्रवासी

हुतात्मा एक्स्प्रेसला जनरल कोच वाढविण्यासाठीचा प्रस्ताव तयार करुन वरिष्ठ स्तरावर पाठविला जाईल. यास मंजूरी मिळताच कोच जोडले जातील.

- प्रदीप हिरडे, वरिष्ठ विभागीय वाणिज्य व्यवस्थापक, सोलापूर