सोलापूर : सोलापूर जिल्ह्याच्या ग्रामीण भागात बुधवारी रात्री बारा वाजेपर्यंत कोरोना चाचणीचे 2 हजार 652 अहवाल प्राप्त झाले आहेत. त्यातील दोन हजार 574 अहवाल निगेटिव्ह आले असून 78 अहवाल पॉझिटिव्ह आले आहेत. कोरोनामुळे चौघांचा मृत्यू झाल्याचेही या अहवालातून स्पष्ट झाले आहे. एकाच दिवशी 104 जण कोरोनामुक्त झाल्याने त्यांना रुग्णालयातून घरी सोडण्यात आले आहे. 

सोलापूर जिल्ह्यातील एकूण कोरोनाबाधित व्यक्तींची संख्या आता 37 हजार 277 झाली आहे. आत्तापर्यंत 1 हजार 98 जणांचा कोरोनामुळे मृत्यू झाला असून रुग्णालयात सध्या 990 ऍक्‍टिव्ह कोरोनाबाधित रुग्ण आहेत. ग्रामीण भागातील 35 हजार 189 जण आत्तापर्यंत कोरोनामुक्त झाले आहेत. कोरोना चाचणीचे 46 अहवाल अद्यापही प्रलंबित आहेत.

आजच्या अहवालामध्ये मृत दाखविण्यात आलेल्या व्यक्तींमध्ये माळशिरस तालुक्‍यातील कन्हेर येथील साठ वर्षिय पुरुष, उत्तर सोलापूर तालुक्‍यातील डोणगाव येथील 45 वर्षीय पुरुष, मंगळवेढा तालुक्‍यातील मरवडे येथील 85 वर्षीय महिला, करमाळ्यातील वेताळ पेठ येथील 71 वर्षिय पुरुष यांचा समावेश आहे.