सोलापूर : तनिष्कांनी बटाटा वेफर्स, सेंद्रिय भाजीपाला, ज्वारीचे पापड, कुरड्या, शेंगा चटणीच्या दिल्लीत केलेल्या प्रात्यक्षिकांनी महिला आणि बालविकास मंत्रालयाच्या सचिव डॉ. अर्चना सिंग, नीती आयोगाच्या रेणू शहा, ''आयसीएपी''च्या कमल खुराणा अक्षरशः थक्क झाल्या.

दक्षिण सोलापूर तालुक्यातील बोरामणी गणातील सकाळ तनिष्कांच्या यशस्विनी अॅग्रो प्रोड्युसर कंपनीच्या रणरागिणींना जी २० अंतर्गत दिल्लीच्या ''वूमन आंत्रप्रिन्युअर्स शोकेसिंग बिझनेस मॉडेल्स अँड एंटरप्रायजेस'' उपक्रमात आमंत्रित करण्यात आले होते. त्यांच्यासह महाराष्ट्र, छत्तीसगड, मध्यप्रदेश येथील एकूण ३० महिला उद्योजक हजर होत्या. यावेळी डॉ. अर्चना सिंग, रेणू शहा, कमल खुराणा यांच्याशिवाय अनस खान, योगेश माळगे, शोविक धार, दिव्या राय, गौरव वशिष्ठ, ऋतुजा पाटील, जितेंद्र शर्मा उपस्थित होते.

दक्षिण सोलापूर तालुक्यातील शीलाताई बरोळे (तांदूळवाडी) यांनी भाजीपाला, गुलाब व गुलाबजल, सुवर्णा मुडके यांनी सेंद्रिय भाजीपाला, लताताई पांडव यांनी ''पाभर''च्या माध्यमातून पापड, कुरड्या, राजश्री येनगुरे यांनी काळा मसाला व शेंगा चटणी, ज्योती राठोड यांनी काळा मसाला व बंजारा ज्वेलरी,

पूजा झुरळे यांनी कडक भाकरी व शेंगा चटणी, अनिता खेडे यांनी सेंद्रिय द्राक्ष व ज्वारी फ्लेवर शेवया, राधा चेंडके यांनी गावरान कोंबडी व शेळी व्यवसाय,सीमा बनसोडे यांनी शेंगा लाडू व ज्वारीचे चकली,महानंदा शिंदे यांनी ज्वारी व ज्वारीचे पदार्थ व भाजीपाला, अनिता माळगे यांनी सकाळ तनिष्का व यशस्विनी कंपनीमार्फत मिलेटमध्ये ज्वारी बिस्कीट, केक, लाडू, शेवया, सांडगे, भाकरी तसेच विविध शासकीय योजना राबवीत असल्याचे सखोल सादरीकरण केले. यावेळी महिला उद्योजकांना प्रमाणपत्र देऊन त्यांचा सत्कार करण्यात आला.