केतूर(सोलापूर)ः तालुक्‍यातील उजनी धरणाच्या बॅकवॉटर क्षेत्रात मोठ्या प्रमाणात लागवड झालेला ऊस व केळीचे पिक जोमदार आले आहे. केळीचे पीक दोनच महिन्यात काढणीला येणार आहे. या दोन्ही पिकांच्या काढणीच्या कामासाठी कोरोना संसर्गाने मजूर मिळण्याचे संकट उभे ठाकले आहे. त्यामुळे शेतकऱ्यासोबत मजूर कंत्राटदार व वाहतुकदार देखील चिंतेत सापडले आहेत. 

हेही वाचाः मोहोळ पालिकेचे 3 कर्मचारी कोरोना बाधित; एकूण संख्या 157 

करमाळा तालुक्‍यातील उजनी बॅकवॉटरच्या क्षेत्रात वाशिंबे, केतूर, उमरड, सोगाव, कंदर, वांगी हा भाग ऊस आणि केळी पिकाचे आगार म्हणून ओळखले जाऊ लागला आहे. परंतु कोरोना रोगाच्या वाढत्या संसर्गामुळे व लॉकडाउनने या भागातील शेतकरी पूर्ण हवालदिल झाला झाला आहे. एकीकडे ऊस पिकाला बगल म्हणून शेतकरी केळी सारख्या नगदी पिकाकडे वळला होता. सध्या केळीचे पीक हे दोन महिन्यात परीपक्वतेला येत आहे परंतु पुढील होणाऱ्या या रोगाच्या परिणामामुळे शेतकऱ्यांच्या मनामध्ये एक प्रकारची अस्वस्थतेचे वातावरण निर्माण झाले आहे. 

हेही वाचाः दूध दरवाढ आंदोलनामुळे या तालुक्‍यातील सव्वा दोन लाख लिटर दुधाचे संकलन थांबले 

तसेच या भागात ऊसाचे पीक मोठ्या प्रमाणात घेतले जाते. मागील वर्षी उजनी धरणातील पाणीसाठा आणि यावर्षी योग्य वेळेला आलेला पाऊस यामुळे उस हे पिक जोमात आहे. उसाला चांगल्या प्रकारचे उत्पन्न मिळेल अशी अपेक्षा उस उत्पादकांना आहे. परंतु कोरोना रोगामुळे ऊस तोडणी कामगार अडचण असल्याने एक प्रकारची चिंता या भागातील शेतकऱ्यांच्या व ऊस वाहतूकदाराच्या मनामध्ये सतावत आहे. 

तोडणी कामगार कामावर येण्याची चिंता 
ऊस तोडणी कामगारांना आम्ही पैसे दिले आहेत. परंतु ज्या भागातील मजुर या कामासाठी येतात त्याच भागात कोरोनाचा रोगांचा संसर्ग वाढत आहे. त्यामुळे मनात चिंतेचे वातावरण आहे. 
- सुभाष मोहन झोळ,वाशिंबे ऊस वाहतुकदार.

संपादनः प्रकाश सनपूरकर