सोलापूर : मंगलकार्यालय, सभागृहात आयोजित कार्यक्रमासाठी परवानगी काढताना दहा हजार रुपयांची अनामत रक्‍कम महापालिकेत भरावी लागणार आहे. सभागृहात कोरोना नियमाचे उल्लंघन न केल्याचा व्हिडिओ महापालिकेकडे सादर केल्यानंतरच ती डिपॉजिट रक्‍कम देण्यात येईल, असा नवा फतवा आयुक्‍त पी. शिवशंकर यांनी काढला आहे. कोरोनाच्या संभाव्य तिसऱ्या लाटेच्या अनुषंगाने महापालिकेने बुधवारपासून नवे आदेश काढले आहेत. शहरात साधारण छोटी-मोठी ७० मंगलकार्यालये तर ४० सभागृह आहेत. आता लग्नसराईमुळे सर्वच मंगलकार्यालयात शुभकार्याचा बार उडत आहेत.

निवडणुकीच्या तोंडावर सभागृहात राजकीय कार्यक्रम धुमधडाक्‍यात सुरू आहेत. कोरोनाच्या पार्श्‍वभूमीवर शासनाने धार्मिक, सामाजिक, राजकीय कार्यक्रमासाठी बंदिस्त सभागृहात १०० तर, खुल्या जागेत २५० व्यक्‍तींची मर्यादा घातली आहे. परंतु ही संख्या एकूण सभागृहाच्या २५ टक्‍के इतकी असणे अपेक्षित आहे. तसा आदेशही महापालिकेकडून काढण्यात आला. महापालिकेकडून सूचना देऊनही शहरात या आदेशाचे पालन होताना दिसून येत नाही. बहुतांश ठिकाणी नियमांचे उल्लंघन होत आहे.

दंडात्मक कारवाईमध्येही कर्मचाऱ्यांकडून सातत्यपणा नसतो. कारवाईत समतोलपणा राहावा. ज्यांनी नियमांचे उल्लंघन केले, त्यांना दंड झालाच पाहिजे. नियमांचे काटेकोर अंमलबजावणी होण्यासाठी नियमावली कडक करण्यात येत आहे. लग्न समारंभासह इतर कार्यक्रमाची परवानगी घेताना दहा हजार रुपये अनामत रक्‍कम भरावी लागणार आहे. कार्यक्रमात कोरोना नियमांचे पालन केल्याचे दाखविण्यासाठी कार्यक्रम ठिकाणचे व्हिडिओ आणि फोटो महापालिकडे सादर करावे. मगच ती अनामत रक्‍कम परत देण्यात येईल. अन्यथा दंड म्हणून ती रक्‍कम जमा करण्यात येईल, असे आदेशात स्पष्ट केले आहे.