लवंग (सोलापूर) : रास्त भाव दुकानातील 3300 रुपये किमतीचा सुमारे 1100 किलो तांदूळ (Ration Rice) काळ्या बाजारात (Black Market) विक्रीसाठी नेण्यात येत असताना पकडल्याने रेशन दुकानातील काळा धंदा पुन्हा एकदा उजेडात आला आहे. हा तांदूळ काळ्या बाजारात विक्री करताना बिजवडी (ता. माळशिरस) (Malshiras Taluka) येथील ग्रामस्थांनी पकडला. त्यामुळे गरिबांसाठी शासनातर्फे रेशन दुकानातून तांदूळ, गहू व इतर जीवनावश्‍य वस्तू लाभार्थींना न देता रेशन दुकानदारांकडून हे धान्य काळ्या बाजारात विकले जात असल्याने संताप व्यक्त होत आहे. अशा घटना अनेकवेळा घडूनही प्रशासनाचेही या घटनांकडे गांभीर्याने पाहिले जात नसल्याने अशा घटना वारंवार घडत आहेत.

याबाबत अकलूज पोलिसांकडून (Akluj Police) मिळालेल्या माहितीनुसार, 1 ऑगस्ट रोजी दुपारी एक वाजण्याच्या सुमारास रास्त भाव धान्य दुकान परवाना क्रमांक 057/98 चे दुकानदार तानाजी सुखदेव शिंदे (रा. बिजवडी, ता. माळशिरस) हा बिजवडी येथील रेशन दुकानातील तांदळाच्या 50 किलोच्या 22 गोण्या म्हणजे जवळपास 1100 किलो तांदूळ (किंमत 3399 रुपये) शिधा पत्रिका धारकांना वाटण्याऐवजी दोन लाख 50 हजार रुपये किमतीच्या टेम्पोतून काळ्या बाजारात विकण्यासाठी नेत असताना काही ग्रामस्थांना आढळून आला. त्यांनी केलेल्या तक्रारीनंतर माळशिरस तहसीलचे पुरवठा निरीक्षक चंद्रशेखर बाळकृष्ण लोखंडे यांनी भेट देऊन खात्री केल्यानंतर बिजवडी येथील रेशन दुकान चालक तानाजी सुखदेव शिंदे (रा. बिजवडी) व वाहन चालक अनिल विजय कचरे (रा. गिरझणी, ता. माळशिरस) यांच्या विरुद्ध जीवनावश्‍यक वस्तू कायदा सन 1955 चे कलम 3 व 7 प्रमाणे अकलूज पोलिसांत कायदेशीर सरकार तर्फे फिर्याद देण्यात आली आहे.

माळशिरस तहसीलचे पुरवठा निरीक्षक चंद्रशेखर लोखंडे यांच्या फिर्यादीवरून अकलूज पोलिसांनी रविवारी (ता. 1) रात्री उशिरा गुन्हा दाखल करून दोघा जणांना ताब्यात घेतले आहे. तसेच टेम्पो वाहन नंबर एम एच 45/टी 3264 जप्त करण्यात आला आहे. अधिक तपास अकलूज चे पोलिस निरीक्षक अरुण सुगावकर करीत आहेत.