Solapur Irrigation News : पावसाळा सुरु होऊन महिना होतोय, तरीदेखील जिल्ह्यात तथा उजनी धरण क्षेत्रात समाधानकारक पाऊस झालेला नाही. त्यामुळे उजनीची पाणीपातळी दिवसेंदिवस खालावत आहे. आता उजनीतील पाणी फक्त पिण्यासाठीच राखीव ठेवले जाणार आहे. पावसाचा अंदाज घेऊन बॅक वॉटरवरील कृषीपंपाचा पाणीपुरवठा आगामी काळात बंद होऊ शकतो, अशी माहिती सूत्रांनी दिली.

मागच्या वर्षी या दिवसात पुण्यासह धरण क्षेत्रातील पावसाचे पाणी धरणात जमा होत होते. पण, यंदा खूपच भयावह परिस्थिती आहे. पेरण्या खोळंबल्या असून उजनीत सध्या अडीच हजाराचा विसर्ग येत आहे. तो विसर्ग दौंडचा नसून स्थानिक परिसरातील पावसाचे पाणी आहे.

खडकवासला धरण अजूनही ४८ टक्क्यांवरच थांबले असल्याने दौंडवरून धरणात काहीच विसर्ग येत नाही. दरम्यान, उजनी धरणाच्या बॅक वॉटरवरील शेतीला दरमहा साधारणतः एक टीएमसी पाणी घेतले जाते. बॅक वॉटरवर ३४ हजार ८०० हेक्टर क्षेत्र आहे.

सध्या धाराशिव, नगर, इंदापूर, सोलापूरसह काही ‘एमआयडीसीं’चा पाणीपुरवठा सुरु आहे. पण, आणखी १५-२० दिवस पाऊस न झाल्यास धरणातील पाणी केवळ पिण्यासाठीच राखीव ठेवले जाणार असल्याची खात्रीशीर माहिती सूत्रांनी दिली. उजनी धरण सध्या मायनस ३५.६९ टक्क्यावर आहे.

‘औज’मधील पाणी ऑगस्टअखेर संपणार

सोलापूर शहरासाठी पाणीपुरवठा करणाऱ्या औज बंधाऱ्यात उजनीतून नुकतेच पाणी सोडण्यात आले आहे. ७ जुलैला ते पाणी बंद केले असून औजमधील पाणी साधारणतः: ४० दिवसांपर्यंत पुरते. पण, या काळात समाधानकारक पाऊस न झाल्यास ऑगस्टअखेर पुन्हा एकदा नदीद्वारे ‘औज’मध्ये पाणी सोडावे लागू शकते. त्यामुळे पावसाचा अंदाज घेऊन लाभक्षेत्र विकास प्राधिकरणाचे अधिकारी काटेकोर नियोजन करीत आहेत.