सोलापूर: कर्नाटकातील बेंदूर सणाच्या प्रथेमध्ये होणाऱ्या प्राणिहत्या टाळण्यासाठी वनखाते व निसर्ग संवर्धन मंडळाने गस्ती मोहिमा सुरू केल्या आहेत. या पथकाने केगावजवळ शिवाजीनगर भागात एका काळविटाची शिकार केल्याचा प्रकार उघडकीस आणला आहे. बेंदुर सणाच्या दुसऱ्या दिवशी शनिवारी (ता. 6) करीच्या दिवशी होणाऱ्या प्राणिहत्यांच्या विरोधात ही कारवाई केली जात आहे. 

हेही वाचाः सोलापूर महापालिकेतील उच्चपदस्थ अधिकाऱ्यास कोरोना 

कर्नाटकामध्ये बेंदूर (बैलपोळा  हा सण मोठ्या प्रमाणात पाळला जातो. त्याला कारहुणवीचा सण म्हणतात. हा सण झाल्यानंतर दुसऱ्या दिवशी करीला प्राण्याची शिकार करण्याचे प्रकार होत असतात. कर्नाटकाच्या सीमेवर शिकारीचे प्रकार रोखण्यासाठी वनखाते व निसर्ग संवर्धन मंडळ यांच्या वतीने विशेष गस्ती मोहीम सुरू झाली आहे. वन्यप्राण्यांची शिकार करण्याचे प्रकार रोखणे गरजेचे झाले आहे. 
सीमावर्ती भागात घोरपड, ससे व इतर वन्यजीवांची शिकार सुरू झाली आहे. याविरोधात वनखात्याने मोठ्या प्रमाणात मोहीम हाती घेतली आहे. उपवनसंरक्षक प्रवीणकुमार बडगे यांनी प्राणिहत्येचा हा प्रकार निव्वळ बेकायदेशीर असून याबाबत कायद्यानुसार कारवाई करण्याचे संकेत दिले आहेत. यामध्ये सोलापूर, अक्कलकोट, मंगळवेढा या तालुक्‍यांच्या परिसरातील गावांमध्ये विशेष लक्ष ठेवले जात आहे. 

हेही वाचाः कामगारांच्या घरी जाऊन विड्या घ्या, अन पानतंबाखू द्या 

बुधवारी (ता. 3) केगावजवळ शिवाजीनगर भागात एका काळविटाची शिकार करण्यात आल्याचे आढळून आले. तेव्हा निसर्ग संवर्धन मंडळ व वनखात्याचे पथक घटनास्थळी पोचले. तेव्हा शिकारी तेथून पळून गेल्याचा प्रकार घडला. काही ठिकाणी या गस्ती पथकाने शिकारीचे जाळे लावल्याचे देखील दिसून आले. मारलेला प्राणी नेमका कोणता होता या बाबत वनखात्याने पंचनामा करून पुढील तपास चालवला आहे. 
या अंतर्गत पाच विशेष पथके स्थापन करण्यात आली आहेत. दक्षिण सोलापूर तालुक्‍यात मंद्रूप, माळकवठे, हत्तूर, औराद, तेलगाव शिवार, वळसंग, कुंभारी, धोत्री, चपळगाव आदी गावांत पथके कार्यरत आहेत. अक्कलकोट तालुक्‍यात वागदरी, शिरवळ, पानमंगरूळ, तडवळ या भागात गस्त सुरू आहे. मैंदर्गी शिवारात दोन सशस्त्र पथके सक्रिय झाली आहेत. या सणाच्या दिवशी शिकार करून धार्मिक कार्यक्रमाची परंपरा आहे. पूर्वी प्राण्याचे मृत शरीर दोरीला लटकवून गावातून मिरवणूक काढण्याची प्रथा वनखात्याच्या कारवाईमुळे बंद झाली आहे.