बार्शी (सोलापूर) : महाराष्ट्र लोकसेवा आयोगाची परीक्षा दोन वेळा उत्तीर्ण झालो. पण जिल्हाधिकारी होण्याची इच्छा होती. त्यामुळे यूपीएससीची तयारी सुरूच होती. शिक्षण सुरू असताना दोन वेळा यूपीएससी परीक्षा दिली, पण यश आले नाही. आता तिसऱ्या प्रयत्नामध्ये मात्र यश प्राप्त झाल्याचे बार्शी येथील अजिंक्‍य विद्यागर यांनी सांगितले. 

हेही वाचा : बार्शी तालुक्‍याच्या शिरपेचात पाचव्यांदा मानाचा तुरा; चुंबचा अविनाश जाधवर झाला जिल्हाधिकारी 

शिक्षणाशिवाय आपण काहीच करू शकत नाही. उच्च शिक्षण घेतले तर उच्च पदांपर्यंत पोचता येते. समाजाची सेवा करता येते. शासनाच्या विविध योजनांची समाजातील अखेरच्या घटकांपर्यंत माहिती होत नाही अन्‌ लाभही होत नाही. त्यासाठी जिल्हाधिकारी होऊन कार्य करण्याची इच्छा मनाशी बाळगून अभ्यास केला आणि आज यशस्वी झालो, अशी भावना आयएएस परीक्षा उतीर्ण झालेल्या बार्शी येथील अजिंक्‍य विद्यागर यांनी व्यक्त केले. 

हेही वाचा : "डॉक्‍टर व्हायचे होते, पण झालो आयपीएस'; पंढरपूर तालुक्‍यातील अभयसिंह देशमुख यांचा प्रवास 

अजिंक्‍य यांचे वडील प्रा. अनंत विद्यागर हे बार्शी येथील बी. पी. सुलाखे कॉमर्स कॉलेजमधून सेवानिवृत्त झाले आहेत तर आई आशा जोगदंड-विद्यागर आगळगाव येथील लोकसेवा विद्यालयात मुख्याध्यापिका आहेत. बहीण प्रियांका एमपीएससी उत्तीर्ण आहे. अजिंक्‍य यांचे सातवीपर्यंतचे शिक्षण महाराष्ट्र विद्यालय येथे तर आठवी ते दहावीपर्यंतचे शिक्षण सुलाखे हायस्कूलमध्ये झाले. पुन्हा अकरावी, बारावी कला शाखेत प्रवेश घेतला. अजिंक्‍य यांचा पदवीला पॉलिटिकल सायन्स हा विषय होता. पदवीचे शिक्षण आबासाहेब गरवारे कॉलेज, पुणे येथे घेतले. पुणे विद्यापीठात 2018 मध्ये पॉलिटिकल सायन्स या विषयात सेट-नेट परीक्षा उत्तीर्ण झाले. 

आपल्या यशाबद्दल अजिंक्‍य विद्यागर म्हणाले, महाराष्ट्र लोकसेवा आयोगातील परीक्षा दोन वेळा उत्तीर्ण झालो. पण जिल्हाधिकारी होण्याची इच्छा होती. शिक्षण सुरू असताना दोन वेळा केंद्रीय लोकसेवा आयोगाची परीक्षा दिली, पण यश आले नाही. तिसऱ्या प्रयत्नामध्ये मात्र यश प्राप्त झाले. खासगी क्‍लास व सेल्फस्टडी करून यश संपादन केले असून, 489 रॅंकने यशस्वी झालो. आई-वडील यांच्यासह मंडोदरी वाकडे (सोलापूर), बार्शीचे सुपुत्र जिल्हाधिकारी महादेव धारूरकर, शिक्षणाधिकारी विष्णू कांबळे यांचे मोलाचे मार्गदर्शन लाभल्यामुळे यशस्वी झालो. 

संपादन : श्रीनिवास दुध्याल