सोलापूर : कोरोना लसीकरणासाठी(corona vaccination) नियुक्त केलेल्या कर्मचाऱ्यांनी सकाळी लवकर ग्रामीण भागात पोहोचावे. सोमवारपासून (ता.३) जिल्ह्यातील १५ ते १८ वयोगटातील मुलांना कोरोनाची लस दिली जाणार आहे. या वयोगटातील मुलांची संख्या अंदाजे २ लाख ३० हजार एवढी असून त्या अनुषंगाने जिल्ह्यातील सर्व माध्यमिक शाळांचे मुख्याध्यापक, शिक्षक, पालक यांच्याशी संपर्क साधून जास्त जास्त लसीकरणासाठी(vaccination) प्रयत्न करा, अशा सूचना जिल्हाधिकारी मिलिंद शंभरकर(collector milind shambharkar) यांनी केल्या आहेत.

जिल्ह्याच्या टास्क फोर्सची(solapur task force) आढावा बैठक गुरुवारी सातरस्ता येथील नियोजन भवनात झाली. त्यावेळी जिल्हाधिकारी शंभरकर यांनी या सूचना केल्या आहेत. यावेळी निवासी उपजिल्हाधिकारी शमा पवार, महानगरपालिका आयुक्त पी. शिवशंकर, पोलिस उपायुक्त डॉ. वैशाली कडूकर, डॉ. वैशंपायन स्मृती शासकीय वैद्यकिय महाविद्यालयाच्या उपअधिष्ठता डॉ. आर. डी. जयकर, जिल्हा शल्यचिकित्सक डॉ. प्रदीप ढेले, जिल्हा आरोग्य अधिकारी डॉ. शीतलकुमार जाधव, इंडियन मेडिकल असोसिएशनचे अध्यक्ष डॉ. मिलिंद शहा, कोविडच्या नोडल अधिकारी डॉ. अग्रजा चिटणीस, डॉ. बसवराज लोहारे, डॉ. अतिश बोराडे, डॉ. अरूण काटकर, सहायक कामगार आयुक्त अशोक कांबळे, समाज कल्याणचे सहायक आयुक्त राहूल काटकर आदी उपस्थित होते.

जिल्हाधिकारी शंभरकर म्हणाले, कोरोनाच्या तिसऱ्या लाटेची शक्‍यता गृहीत धरून सर्व विभागांनी दक्ष रहावे. जिल्ह्यातील सर्व ऑक्‍सिजन प्लांट व ऑक्‍सिजन प्रोसेस प्लांट सुरू असणे आवश्‍यक आहे. सर्व टॅंकमध्ये ऑक्‍सिजन भरून ठेवणे गरजेचे आहे. सर्व सीसीसी, आयसोलेशन सेंटर पूर्ववत चालू करावे लागले तर त्या अनुषंगाने सर्व तयारी करणे आवश्‍यक आहे. ऑक्‍सिजन बेड व इतर काही आरोग्य विषयक साधन सामुग्री तपासून घेण्याच्या सूचना त्यांनी केल्या आहेत.