माळीनगर(सोलापूर): पंचवीस चार ते टेंभुर्णी मार्गाच्या कॉंक्रिटीकरण झालेल्या रस्त्याच्या साईडपट्ट्यांचे काम निकृष्ट दर्जाचे झाल्याने अवजड वाहने त्यावर फसू लागली आहेत. 

हेही वाचाः यापुढे केशकर्तनासाठी या अटी 

गेली दीड वर्षापासून या मार्गाचे कॉंक्रिटीकरणाचे काम चालू आहे. सध्या कॉंक्रिटीकरणाचे काम बऱ्यापैकी झाले आहे.काम पूर्ण झालेल्या भागातील साईडपट्ट्या मुरूम टाकून भरण्यात आल्या आहेत. त्यासाठी काही भागात मातीमिश्रित मुरूम वापरण्यात आल्याचे दिसून येत आहे. साईडपट्ट्या टणक मुरुमाने भरलेल्या नाहीत. त्यावर पाणी मारून पुरेसे रोलिंग करण्यात आलेले नाही. निकृष्ट काम झालेल्या अशा साईडपट्ट्यांवरून अवजड वाहने गेल्यावर ती फसत आहेत. त्यामुळे अपघात होण्याची शक्‍यता नाकारता येत नाही. 

हेही वाचाः अक्कलकोटमधील दुकाने सोमवारपासून उघडणार 

काही भागात साईड पट्ट्या काही प्रमाणात खचल्याचे आढळून येत आहे. कठीण मुरूम भरून चांगले रोलिंग न केल्याने कॉंक्रिटीकरण केलेला रस्ता वर आला आहे. तर साईडपट्ट्या खाली गेल्याचे दिसत आहे. वाहने फसल्यानंतर त्यांचे मोठे नुकसान होत आहे. फसलेली वाहने क्रेनने ओढून काढावी लागत आहेत.त्याचा वाहनचालकांना विनाकारण आर्थिक भुर्दंड सोसावा लागत आहे. तसेच फसलेली वाहने काढताना नजीकच्या शेताचा वापर करावा लागत आहे. त्यामुळे शेतीचे नुकसान होऊन शेतकऱ्यांना त्याचा फटका बसत आहे. पावसाळ्यात साईड पट्ट्यावर वाहने आणखी फसण्याची शक्‍यता आहे. शिवाय या मार्गावरून ऊसाची वाहतूक देखील मोठ्या प्रमाणावर होत असते. त्यामुळे साखर हंगाम सुरू झाल्यावर ऊसाची वाहने साईड पट्ट्यावर फसल्यास अपघाताचे प्रमाण वाढण्याबरोबरच वाहतुकीस अडथळा निर्माण होण्याचा संभव आहे. त्यामुळे कंत्राटदाराने या मार्गाच्या साईडपट्ट्या मजबूत कराव्यात,अशी मागणी वाहन चालकांकडून होत आहे.