पंढरपूर (सोलापूर) : गोकुळाष्टमी (Gokulashtami) आणि श्रावण महिन्यातील शेवटच्या सोमवार निमित्ताने आज (सोमवार) पंढरपूर येथील श्री विठ्ठल - रुक्‍मिणी मंदिरात (Vitthal-Rukmini Temple) विविध फळांसह (Fruits) देशी - विदेशी फुलांची (Flowers) आकर्षक सजावट करण्यात आली आहे. हवेली तालुक्‍यातील टाळगाव चिखली येथील पांडुरंग रत्नाकर मोरे व बबन मोरे या भाविकांच्या वतीने ही सजावट करण्यात आली आहे. फळा - फुलांच्या सजावटीमुळे देव नटला आहे.

देवाचा गाभारा, प्रवेशद्वार, सोळखांबी, सभामंडप यासह संपूर्ण मंदिर फुलांनी सजविण्यात आले आहे. झेंडू, ऑर्केड, कार्नेशियन, शेवंती, कामिनी, ऍथोरियम, गुलाब, आष्टर, जिप्सोफेलिया, तुळस व गड्डी फुले अशा 2000 किलो देशी - विदेशी फुलांचा आणि पानांचा वापर करून मंदिर सजवण्यात आले आहे. तर मोसंबी, सफरचंद, अननस, सीताफळ, कलिंगड व संत्री अशा 500 किलो फळांचा वापर या सजावटीसाठी करण्यात आला आहे. रंगीबेरंगी फुले आणि विविध फळांच्या सजावटीमुळे देवाचे रूप अधिकच खुलून दिसत आहे.

कोरोनाच्या पार्श्वभूमीवर मागील दीड वर्षापासून मंदिर कधी खुले तर कधी बंद असल्यामुळे भाविकांना दर्शन घेता आले नाही. आषाढी व कार्तिकी वारीमध्येही मंदिर दर्शनासाठी बंद होते. त्यामुळे श्री विठ्ठल - रुक्‍मिणी मंदिर भाविकांना दर्शनासाठी आजही बंदच आहे. त्यामुळे भाविकांना नामदेव पायरीपासूनच श्री विठ्ठल - रुक्‍मिणी मातेचे दर्शन घ्यावे लागत आहे.