सोलापूर : महाराष्ट्रातील विधानपरिषदेच्या शिक्षक व पदवीधर मतदार संघातील रिक्त झालेल्या पाच जागांसाठी केंद्रिय निवडणूक आयोगाने आज वेळापत्रक जाहीर केले आहे. औरंगाबाद, पुणे, नागपूर येथील पदवीधर व अमरावती आणि पुणे येथील शिक्षक मतदारसंघासाठी विधान परिषदेची ही निवडणूक होत आहे. 

या निवडणुकीची अधिसूचना 5 नोव्हेंबरला प्रसिद्ध होणार आहे. 12 नोव्हेंबर पर्यंत अर्ज स्वीकृती होणार आहे. प्राप्त अर्जांची छाननी 13 नोव्हेंबरला तर 17 नोव्हेंबरला अर्ज माघार घेण्याची मुदत देण्यात आली आहे. या पाचही जागांसाठी 1 डिसेंबरला सकाळी आठ ते सायंकाळी पाच या वेळेत मतदान होणार आहे. 

3 डिसेंबर रोजी या पाचही जागांसाठी मतमोजणी होणार आहे. औरंगाबाद पदवीधर मतदार संघाचे आमदार सतीश चव्हाण, नागपूर पदवीधरचे आमदार अनिल सोले, अमरावती शिक्षक मतदारसंघाचे आमदार श्रीकांत देशपांडे आणि पुणे शिक्षक मतदार संघाचे आमदार दत्तात्रय सावंत यांच्या सदस्यत्वाची मुदत संपल्याने या जागा रिक्त झाल्या आहेत. पुणे पदवीधर मतदारसंघाचे तत्कालिन आमदार भाजपचे प्रदेशाध्यक्ष चंद्रकांतदादा पाटील यांची पुण्यातील कोथरूड मतदारसंघातून विधानसभेत निवड झाल्याने ही जागा रिक्त झाली आहे.