सोलापूर ः कोरोनाच्या लढाईत सोलापूर जिल्ह्यात प्रशासन चांगले काम करत आहे. पण, याठिकाणचे कामगार व गोरगरिबांना मुबलक प्रणाणात धान्य देण्याची मागणी खासदार डॉ. जयसिद्धेश्‍वर महास्वामी यांनी भाजपचे राष्ट्रीय अध्यक्ष जे. पी. नड्डा यांच्याकडे केली.

कोरोनाच्या पार्श्‍वभूमिवर राज्याचा आढावा घेण्यासाठी खासदारांशी भाजपचे राष्ट्रीय अध्यक्ष जे. पी नड्डा यांनी संवाद साधला. नड्डा यांच्याशी व्हिडिओ कॉलद्वारे साधलेल्या चर्चेत डॉ. महास्वामींनी सोलापूर जिल्ह्याची परिस्थिती सांगितली. यावेळी रस्ते वाहतूकमंत्री नितीन गडकरी, रेल्वेमंत्री पियुष गोएल, संघटनमंत्री विजय पुराणिक उपस्थित होते.

सोलापूर जिल्हा हा कामगारांचा म्हणून ओळखला जातो. या संकटकाळात सोलापूरातील कुशल कामगारांना मुबलक धान्य मिळावे. त्यांची उपासमार होऊ नये यासाठी उपाययोजना करण्याची मागणी केली. तसेच लागू करण्यात आलेल्या योजनांचा लाभ त्यांना तात्काळ मिळावा. सोलापूरात सध्या कोरोनाचे 15 रुग्ण आढळले असून आरोग्य विभाग, जिल्हा प्रशासन पोलीस प्रशासन, शहर आणि जिल्ह्यातील सर्व यंत्रणा चांगले काम करत आहे. विशेषतः सोलापुरातील वस्त्रोद्योग, फलोत्पादन आणि इतर उद्योग सुरु झाल्यास बरे होईल. हरिद्वार येथे सोलापूरातील 70 जण अडकले आहेत. त्यांनाही सोलापूरला आणण्यास परवानगी देण्याची मागणी खासदारांनी केली.