सोलापूर : संशयातून कासारवाडी घाटात (जि. कोल्हापूर) पत्नीचा खून करून दुचाकीवरून कलबुर्गीकडे निघालेल्या तरुणाला वाटेत पश्चात्ताप झाला. त्यातून तो शुक्रवारी (ता. ६) सोलापूर शहरातील फौजदार चावडी पोलिस ठाण्यात स्वत:हून हजर झाला. त्याला पोलिसांनी शिरोली एमआयडीसी पोलिसांच्या ताब्यात दिले आहे. सचिन चंद्रशेखर राजपूत (वय ३३, मूळ गाव रा. कलबुर्गी, ता. जमखंडी, बागलकोट) असे त्या संशयित आरोपीचे नाव आहे.
संशयित आरोपी सचिन राजपूत याने पत्नी शुभांगी (वय २८) हिला गुरुवारी (ता. ५) दुचाकीवरून देवदर्शनासाठी जावू म्हणून ज्योतिबा मंदिरात नेले. त्यावेळी त्याने पत्नीवर संशय घेऊन भांडण केले. त्या रागातून कोडोली ते ज्योतिबा मंदिराकडे जाणाऱ्या रस्त्यावरील घाटात निर्जनस्थळी पत्नीवर चाकूने सपासप वार केले. बेशुद्ध अवस्थेत तिला तेथेच सोडून तो दुचाकीवरून पळून आला. दुसऱ्या दिवशी म्हणजे आज शुक्रवारी कलबुर्गी या त्याच्या मूळ गावी जाण्यापूर्वी सोलापूर शहरात आला. त्याला पश्चात्ताप झाल्याने तो सोलापुरातील जवळच्या पोलिस ठाण्याची माहिती विचारून फौजदार चावडी पोलिसांत हजर झाला. त्याने वरिष्ठ पोलिस निरीक्षक अरविंद माने यांची भेट घेऊन ‘मी पत्नीचा खून केला आहे’, असे सांगितले. पत्नी शुभांगीवर चाकूने वार करून घर बंद करून आल्याचे सांगितले. त्यानुसार फौजदार चावडी पोलिसांनी शिरोली एमआयडीसी पोलिसांशी संपर्क साधला. त्याच्या घरी जाऊन पाहिले पण पोलिसांना त्याच्या घरात संशयास्पद काहीही आढळले नाही.
त्यानंतर फौजदार चावडी पोलिस ठाण्यातील पोलिस उपनिरीक्षक राधा जेऊघाले यांनी त्याला विश्वासात घेऊन विचारपूस केली. त्यावेळी त्याने पत्नीचा खून कोठे केला, याची माहिती दिली. शिरोली एमआयडीसी पोलिसांनी त्याठिकाणी जाऊन पाहणी केली. त्यावेळी कासारवाडी घाटातील मुख्य रस्त्यापासून काही अंतरावर एक महिला रक्ताच्या थारोळ्यात पडल्याचे दिसले. त्यानंतर फौजदार चावडी पोलिसांनी त्याला निगराणीत ठेवले आणि शिरोली एमआयडीसी पोलिसांचे पथक सोलापुरात आल्यावर सचिनला त्यांच्या ताब्यात दिले.
संशयित आरोपीविरुद्ध बलात्काराचाही गुन्हा
पत्नीचा खून केलेला सचिन राजपूत हा आर्मीत होता. चार वर्षांपूर्वी त्याने कोल्हापुरातील एका तरुणीला पळवून नेले आणि तिच्यासोबत विवाह करताना मुलीच्या कुटुंबीयांनी त्याला पकडून पोलिसांच्या ताब्यात दिले. त्यावेळी त्याच्यावर बलात्काराचा गुन्हा दाखल झाला होता. तेव्हापासून तो फरार होता. आपल्या पत्नीचेही बाहेर अफेअर असल्याचा त्याला संशय होता. त्या रागातून त्याने देवदर्शनाचा बहाणा करून पत्नीला कासारवाडी घाटात नेले आणि त्याठिकाणी तिच्या पोटावर दोन आणि मानेवर एक वार करून खून केला. त्या दोघांना चार वर्षांचा एक मुलगा असल्याची बाब पोलिस तपासात समोर आली आहे.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.