सोलापूर : सध्या अयोध्येसह संपूर्ण जग भगवान रामलल्लाच्या आगमनाची, मूर्ती स्थापनेची आतुरतेने वाट पाहत असताना, सोलापुरातील तरुण तरी मागे कसे राहतील? अशीच प्रचिती सोलापुरात आली आहे. अक्षरमित्र अभिजित भडंगे यांनी पोस्टकार्डावर चक्क एकशे आठ (१०८) वेळा ‘जय श्रीराम‘ हा चैतन्यदायी जपमंत्र सुंदर हस्ताक्षरात लिहिला आहे.

स्वतः तयार केलेल्या कटनिबच्या शाईपेनने त्यांनी ही ‘रामभक्ती‘ साकारत रामनामाचा जप केला आहे. यासाठी त्यांना तब्बल दोन तास वीस मिनिटे एवढा वेळ द्यावा लागला. प्रत्येक दहावा जप त्यांनी ‘लालशाई‘ मध्ये लिहिला. हिंदू धर्मात १०८ अंक हा जपासाठी, प्रदक्षिणेसाठी, दानासाठी अतिशय शुभ मानला जातो.

पोस्टकार्डच्या पुढच्या बाजूस ८४ व मागील बाजूस २४ वेळा, असे एकूण १०८ वेळा अक्षरमित्र अभिजित भडंगे यांनी काळ्या व लाल रंगाच्या सुंदर हस्ताक्षरात जय श्रीराम लिहीत अनोख्या पद्धतीने भगवान प्रभू श्रीरामचंद्रांची अक्षरभक्ती केली आहे.

तसेच सोलापूरमध्ये चित्रकार, नृत्य, शिल्प, गायन, वादन असे विविध क्षेत्रात असंख्य कलाकार आहेत. प्रत्येकाने आपापल्या पद्धतीने भगवान रामाला अभिवादन करत जल्लोष करत हा उत्सव अधिक संस्मरणीय करावा, असे आवाहन अक्षरमित्र अभिजित भडंगे यांनी केले आहे.