निपाणी (बेळगाव) : निपाणी तालुक्यातील २७ ग्रामपंचायती साठी रविवारी (ता.२७) मतदान झाले होते. बुधवारी सकाळी आठ वाजता येथील जी. आय. बागेवाडी महाविद्यालयमध्ये मतमोजणीस प्रारंभ झाला. चिकोडीचे पोलिस उपाधीक्षक मनोज कुमार नायक यांच्या मार्गदर्शनाखाली मंडल पोलीस निरीक्षक संतोष सत्य नायक, उपनिरीक्षक अनिल कुमार कुंभार यांनी मतदान केंद्र परिसरात चोख बंदोबस्त ठेवला होता. शहरातील कोल्हापूर वेसवरील मुख्य रस्ता वाहनधारकांसह नागरिकासाठी दिवसभर बंद ठेवला. 

सकाळी आठ वाजता मतमोजणी केंद्रावर तहसीलदार प्रकाश गायकवाड, मंडल पोलीस निरीक्षक संतोष सत्यनायक व इतर अधिकाऱ्यांची उपस्थितीत मतमोजणीस प्रारंभ झाला. सकाळी साडेआठ वाजेपर्यंत ग्रामीण भागातील उमेदवार व त्यांचे सहकारी मतमोजणी केंद्रावर दाखल झाले. निपाणी कोल्हापूर रोडवरील अकोळ क्रॉस, बागेवाडी महाविद्यालया जवळील ग्रीन पार्क आणि मानवी कॉम्प्लेक्सजवळ बॅरिकेट्स लावून मुख्य रस्ता बंद केला होता. त्यामुळे आंबा मार्केट महामार्गे वाहने वळविण्यात आली होती. दरम्यान सकाळी लवकर अनेक गावातील मतमोजणी सुरू न झाल्याने महिला व पुरुष सदस्य बागेवाडी महाविद्यालयाच्या परिसरात चौकाचौकात थांबून निकालाबाबत तर्कवितर्क लढविले जात होते.

हेही वाचा - स्थानिक राजकारणाचा केंद्रबिंदू ; कोल्हापूर महापालिका इमारत -

मतमोजणी महाविद्यालयातील दुसऱ्या मजल्यावर असल्याने प्रारंभी मतमोजणी खोली सापडत नसल्याने अनेक उमेदवार प्रवेशद्वाराजवळ येऊन चौकशी करीत होते. त्यानंतर महसूल खात्याचे कर्मचाऱ्यांनी त्यांना संबंधित मतमोजणी खोलीमध्ये पाठवून दिले. मतमोजणी केंद्रात जाताना उमेदवार व त्यांचे सहकारी यांना मोबाईल, प्लास्टिक कॅरीबॅग, पाण्याच्या बाटल्या व इतर धारदार वस्तूंना पोलिसांनी बंदी घातली होती. त्यामुळे वरील सर्व साहित्य प्रवेशद्वारावर ठेवले होते. एकंदरीत मतमोजणी केंद्राच्या आवारात चोख बंदोबस्त ठेवण्यात आला होता.

जल्लोष विजयी मिरवणुकांना बंदी

मतमोजणी केंद्रासह ग्रामीण भागात एक मंडल पोलीस निरीक्षक चार उपनिरीक्षक, ८० पोलिसांचा बंदोबस्त ठेवण्यात आला होता. निकालानंतर विजय उत्सवावर विजयी मिरवणुका काढण्यावर प्रशासनाने बंदी घातली आहे. त्याचे उल्लंघन करणाऱ्यांवर कठोर कारवाई करण्यात येणार असल्याचे मंडल पोलीस निरीक्षक संतोष सत्यनायक यांनी सांगितले.

मास्कची सक्ती

मतमोजणीच्या प्रत्येक खोलीमध्ये उमेदवार व त्यांचे सहकारी व मतमोजणी कर्मचारी असल्याने सर्वांनाच मास्कची सक्ती केली होती. पण अनेक उमेदवारही मास्क न घालता मतमोजणी खोलीमध्ये वावरत होते. शिवाय बर्‍याच ठिकाणी सोशल डिस्टन्स पाळले जात नव्हते. त्यामुळे पुन्हा तोरणाचा संसर्ग होण्याची शक्यताही काही कर्मचारी व अधिकाऱ्यांकडून व्यक्त केली जात होती.

हेही वाचा -  दुर्दैव! बापाच्या निधनानंतर दोन वर्षातच मुलाचा अपघाती मृत्यू -

ध्वनिक्षेपकावरून निकाल

निपाणी तालुका निर्मितीनंतर प्रथमच ग्रामपंचायत निवडणुकीची मतमोजणी निपाणी शहरात झाली त्या पार्श्वभूमीवर नागरिकांची गर्दी होण्याची शक्यता लक्षात घेऊन सर्वच रस्ते बंद केले होते. टप्याटप्याने येणारे निकाल ध्वनिक्षेपकावरून सांगितले जात असल्याने बस स्थानक परिसर आणि अक्कोळ येथे नागरिक थांबून निकाल ऐकत होते.

संपादन - स्नेहल कदम