आरग : बेडग (ता. मिरज, जि. सांगली ) मधील एका खासगी शिक्षण संस्थेच्या शाळेत इयत्ता नववीत शिकणाऱ्या विद्यार्थ्याचा कोरोना अहवाल पॉझिटिव्ह आला आहे. या विद्यार्थ्याच्या संपर्कातील एकूण 38 विद्यार्थ्यांचे स्वॅब तपासणीसाठी घेण्यात आले आहेत. यामुळे गावातील कोरोनाबाधित रुग्णांची संख्या आता चार झाली आहे. सर्वांना होम क्‍वारंटाईन करण्यात आले असल्याची माहिती वैद्यकीय अधिकारी डॉ. नितीन चिकुर्डेकर यांनी दिली.

हा विद्यार्थी कर्नाटकात होणाऱ्या एका राष्ट्रीय स्पर्धेत खेळण्यासाठी जाणार होता. स्पर्धेच्या नियमानुसार सर्वप्रथम त्याने कोरोना (आरटीसीपीआर) चाचणी करून घेतली. या चाचणीत त्याचा अहवाल पॉझिटिव्ह आला. यानंतर या विद्यार्थ्याच्या संपर्कातील एकूण 38 जणांचा कोरोना अहवाल तपासणीसाठी घेण्यात आला.

त्यातील 31 विद्यार्थ्यांचा रॅपिड एंटिजन टेस्ट अहवाल निगेटिव्ह आला आहे, तर अन्य सात विद्यार्थ्यांमध्ये सर्दी, ताप, खोकल्याची लक्षणे दिसून येत असल्याने त्यांच्या घशातील स्वॅबचे नमुने घेण्यात आले आहेत. लक्षणे असणाऱ्या सात जणांची कोरोना (आरटीसीपीआर) चाचणी केली आहे. त्याचा अहवाल दोन दिवसांनी येणार असल्याची माहिती वैद्यकीय अधिकाऱ्यांनी दिली. 

दरम्यान, बाधित विद्यार्थ्यांच्या वर्गातील इतर मुलांना कोणतीही लक्षणे आढळल्यास त्वरित प्राथमिक आरोग्य केंद्राशी संपर्क साधण्याचे आवाहन आरोग्य विभागाने केले आहे. याशिवाय शालेय प्रशासनातर्फेही तातडीने शाळा व्यवस्थापन समिती व शालेय शिक्षकांची बैठक घेण्यात आली व शाळा शनिवारपासून (ता. 20) 14 दिवसांसाठी बंद ठेवण्याचा निर्णय घेण्यात आला. 

आरोग्य विभागास संपर्क करा

कोरोना बाधित विद्यार्थ्यांच्या संपर्कातील विद्यार्थ्यांचे स्वॅब तपासणीसाठी घेण्यात आले आहेत. शाळेतील इतर विद्यार्थ्यांमध्ये कोणतीही लक्षणे आढळल्यास तपासणी करून घ्यावी व आरोग्य विभागास संपर्क करावा. सर्वांना होम आईसोलेटेड केले आहे. 
- डॉ. नितीन चिकुर्डेकर, वैद्यकीय अधिकारी, आरग 

संपादन : युवराज यादव