जत-उमदी (ता. जत) येथे जमीनीच्या वादातून मुलानेच आई, वडील, बहिणीचा कुऱ्हाडीच्या दांडक्‍याने वार करून खून केल्याने जत तालुक्‍यासह जिल्हा हादरला आहे. या घटनेची माहिती मिळताच उमदी, जत पोलिस ठाण्याचे अधिकाऱ्यांनी घटनास्थळी धाव घेतली. ही घटना सकाळी 10 च्या सुमारस घडली. घटनास्थळी मोठ्या संख्येने गर्दी झालेली होती. संशयीत आरोपी घटनेनंतर पोलिस ठाण्यात हजर झाला. 
याबाबत पोलिसांकडून मिळालेली माहिती अशी, उमदी येथे गुरूलिंगप्पा अन्नाप्पा अरकेरी हे आपल्या कुटूंबासोबत राहत होते. या कुटूंबात त्यांची पत्नी नागवा गुरूलिंगप्पा अरकेरी, मुलगा सिध्दपा गुरूलिंगप्पा अरकेरी, व बहिण समुद्राबाई बिरादर राहत होते. गुरूलिंगप्पा व मुलगा सिध्दप्पा यांच्यामध्ये जमीनीच्या वादातून वारंवार वादावादी झाली आहे. बुधवारी सकाळी पुन्हा यांच्यामध्ये जोरदार वादावादी झाली. या वादावादीमध्ये संशयीत आरोपी मुलगा सिध्दापा अरकेरी (वय 58) याने वडिल गुरूलिंगप्पा अन्नाप्पा अरकेरी (वय 82) आई नागवा अरकेरी (वय 75) बहिण समुद्राबाई बिरादर (वय 62) या तिघांचा कुऱ्हाडीने अंगावर वार करून खून केला.