तासगाव : उपमुख्यमंत्री झाल्यानंतर अजित पवार (Ajit Pawar) यांचे शहरात राष्ट्रवादी काँग्रेसने स्वागत केल्यानंतर त्यांनी व्यक्त केलेली नाराजी राजकीय चर्चेचा विषय ठरली आहे. आमदार पाटील विरोधकांनी हा मुद्दा उचलून धरला आहे. त्यांच्या नाराजीचे उलटसुलट अर्थ काढले जाऊ लागले आहेत.

माजी गृहमंत्री दिवंगत आर. आर. पाटील आणि शरद पवार (Sharad Pawar), अजित पवार, सुप्रिया सुळे यांचे संबंध सर्वश्रुत आहेत. आर. आर. पाटील यांच्या निधनानंतर त्यांच्या घराला पवारांनी सावरून घेतले. आर. आर. पाटील यांनीही शेवटपर्यंत राष्ट्रवादी काँग्रेससाठी काम केले, हे संपूर्ण महाराष्ट्राने पाहिले आहे. राष्ट्रवादी काँग्रेस फुटल्यानंतर आमदार सुमन पाटील (Suman Patil) यांनी शरद पवार गटात राहण्याचा निर्णय घेतला. या निर्णयाचे आबाप्रेमींनी स्वागत केले.

‘आर. आर. पाटील हयात असते, तर त्यांनीही हेच केले असते,’ अशा प्रतिक्रिया त्या वेळी ऐकू येत होत्या. त्या पार्श्वभूमीवर अजित पवार यांनीही, आमदार श्रीमती पाटील यांनी आपल्या गटात यावे, यासाठी प्रयत्न केले होते. त्यासाठी काही प्रमुख कार्यकर्त्यांना बोलावून घेऊन चर्चाही केली होती. या विषयावर सुरेश पाटील यांच्याशीही चर्चा झाली होती. मात्र आबा घराणे शरद पवार यांच्याशी ठामपणे एकनिष्ठ राहिले.

उपमुख्यमंत्री अजित पवार नुकतेच विटा येथे आमदार अनिल बाबर यांच्या निधनानंतर सांत्वनासाठी आले होते. तासगावमार्गे ते सांगलीला कार्यक्रमासाठी जात असताना आमदार गटाच्या कार्यकर्त्यांनी थांबवून त्यांचे स्वागत केले. मात्र अजित पवार यांनी, ‘आता माझे स्वागत करताय, तुम्ही माझी काय इज्जत राखली,’ अशा शब्दांत नाराजी थेट बोलून दाखवली.

अजित पवार यांची आबा घरावरील या नाराजीची चर्चा राजकीय वर्तुळात रंगली आहे. राष्ट्रवादी काँग्रेसमध्ये फूट पडली असताना आमदार श्रीमती पाटील अजित पवार गटात गेल्या नाहीत, याबाबत अजित पवार नाराज असणे साहजिक आहे. मात्र या स्वागताच्या घटनेचे उलटसुलट अर्थ काढले जाऊ लागले आहेत.

अजितदादांचे वक्तव्य कार्यकर्त्यांना झोंबले

अजित पवार यांच्या वक्तव्यावर आमदार पाटील अथवा रोहित पाटील यांनी कोणतेही वक्तव्य केलेले नाही. मात्र आबा घरावरील नाराज अजितदादांचे, ‘आता माझे स्वागत करताय, तुम्ही माझी काय इज्जत राखली,’ हे वक्तव्य राष्ट्रवादी काँग्रेसमधील कार्यकर्त्यांना चांगलेच झोंबले आहे, हे मात्र खरे.