तासगाव : खासदार संजय पाटील (Sanjay Patil) यांचे निष्ठावंत कट्टर समर्थक सचिन गणपतराव पाटील (Sachin Patil) यांनी मुंबई येथे राष्ट्रवादी काँग्रेस मध्ये प्रवेश केला. उपमुख्यमंत्री अजित पवार (Ajit Pawar) यांच्या हस्ते त्यांना तासगाव तालुका अध्यक्ष पदाचे पत्र देण्यात आले. खासदार पाटील गटाला हा धक्का मानला जात आहे.

राष्ट्रवादीध्ये फूट पडल्यानंतर राष्ट्रवादी काँग्रेस (उपमुख्यमंत्री अजित पवार गट) मधे तासगाव तालुक्यात प्रवेश होत आहे. काही पदाधिकारी ही निवडण्यात आले आहेत मात्र तासगाव (Tasgaon Politics) तालुका अध्यक्ष निवड झालेली नव्हती, आज त्याला मुहूर्त लागला. मांजर्डे येथील भारतीय जनता पक्षाचे प्रमुख कार्यकर्ते सचिन पाटील यांनी उपमुख्यमंत्री अजित पवार यांच्या उपस्थितीत राष्ट्रवादी काँगेसमधे प्रवेश केला.

यावेळी माजी आमदार सदशिव पाटील, राष्ट्रवादी काँग्रेस पक्षाचे जिल्हाध्यक्ष वैभव पाटील उपस्थित होते. सचिन पाटील यांना तासगाव तालुका अध्यक्ष पदाची जबाबदारी देण्यात आली असून त्या आशयाचे पत्र उपमुख्यमंत्री पवार यांच्या हस्ते देण्यात आले. पक्ष वाढीसाठी जोमाने कामाला लागा लागेल ती मदत आणि ताकद तुमच्या पाठीशी उभी करू अशी निःसंदिग्ध ग्वाही अजित पवार यांनी दिली.

सचिन पाटील हे खासदार पाटील यांचे निकवर्तीय मानले जातात. मांजर्डे भागातील ते प्रमुख नेते होते. भाजपचे विसापूर मांजर्डे जिल्हा परिषद गटाचे प्रमुख म्हणून काम केले आहे. खासदार पाटील यांना सचिन पाटील यांचा राष्ट्रवादी प्रवेश म्हणजे धक्का मानला जात आहे. या निमित्ताने मांजर्डे विसापूर मंडलामध्ये वैभव पाटील यांचा आता स्वतंत्र थेट गट तयार होणार आहे.