सांगली : गेल्या चार दिवसांपासून उन्हाचे चटके बसत आहेत. तापमानात वाढ झाली आहे. गेले चार दिवस असलेले ३८ ते ३९ अंश सेल्सिअस तापमान पुढील सहा दिवस राहणार आहे. एप्रिल, मे महिन्यात जाणवणाऱ्या झळा मार्च अखेरीस जाणवत आहेत. ग्रामीण भागातील शेतीच्या कामांच्या वेळा बदलल्या आहेत. 

गेल्या आठवड्यापासून उष्मा वाढतो आहे. सकाळी साडेनऊ वाजल्यानंतर उन्हाचा झळा सुरू होत आहेत. दुपारच्या सुमारास तीव्रता आणखी वाढते. वयोवृद्धांमध्ये उष्माघाताची भीती आहे. येते पाच दिवस जिल्ह्यातील तापमान ३९ ते ४० अंश असे राहील, असा अंदाज आहे. सध्या शेतीच्या कामाच्या वेळात मोठा बदल केला जात आहे. सकाळी सात वाजताच शेतकरी मजूर कामावर जात आहेत. सकाळी आणि सायंकाळच्या टप्प्यात कामे सुरू केली जात आहेत. दुपारच्या वेळी विश्रांती घेतली जात आहे.

हेही वाचा - पोलिस, रुग्णवाहिका यांसह सर्व सेवांच्या हेल्पलाईन एकाच नंबरवर; राज्यभरात होणार लागू

मार्चअखेरीस तापमानात वाढ झाल्याने एप्रिल-मेमध्ये किती तापमान वाढेल, याची चिंता शेतकऱ्यांना लागून राहिलेली आहे. सध्या तरी शेतीच्या उन्हाळी मशागतीची कामे सुरू होणार आहेत. एप्रिल छाटण्यांनाही सुरवात होणार  आहे. बहुतांश कामे सकाळी व सायंकाळच्या सत्रात करण्याकडे मजूर आणि शेतकऱ्यांचा ओढा आहे.