सोलापूर ः शहर व हद्दवाढ भागातील मिळकती आणि नळजोड यांचे प्रमाण जवळपास व्यस्त आहे. त्यामुळे लाखो लिटर पाणी अनधिकृत नळजोडातून चोरी होते हे उघड आहे. असे नळजोड महापालिका उत्पन्नाच्या "मुळावर'असून, पाणीचोरी करणाऱ्यांविरुद्ध कडक कारवाई व्हावी अशी मागणी होत आहे. विभागीय कार्यालयाने नुकत्याच केलेल्या पाहणीत नळ नसताना आकारणी झाल्याची हजारो प्रकरणेही सापडली आहेत, त्यामुळे सावळा गोंधळ उघड झाला आहे. 

हेही वाचा... राज्य मंत्रीमंडळाचे खाते वाटप जाहीर 

नळधारकांचा प्रतिसाद नाही 
अनधिकृत नळजोड असलेल्यांना 10 हजार रुपये दंड करण्याची शिफारस करण्यात आली होती. मात्र सर्वसाधारण सभेने नियमित पाणीपट्टी आकारून नळ नियमित करण्याचा ठराव झाला. मात्र त्यास प्रतिसाद मिळाला नाही. त्यामुळे शहरातील अनधिकृत नळजोडाचा विषय पुन्हा चर्चेला आला आहे. शहर व हद्दवाढ भागात असलेल्या सुमारे 35 ते 40 हजार अनधिकृत नळांच्या माध्यमातून रोज 20-22 दशलक्ष लिटर पाण्याची चोरी केली जाते. या पाण्याची किंमत कोट्यवधी रुपये आहे. ते शोधून बंद करणे महापालिकेस आजपर्यंत तरी शक्‍य झाले नाही. 

हेही आवर्जून वाचा... दिव्यांगांसाठीचे पहिले न्यायालय पुण्यात 

हद्दवाढीत अनधिकृत नळजोड 
अर्धा इंची आकाराच्या नळाला तासाभरात हजार लिटर पाणी येते. तीन दिवसांआडच्या नियोजनामुळे तीन ते चार तास पाणी सोडले जाते. त्यामुळे प्रतितास पाच दशलक्ष लिटर याप्रमाणे चार तासांत 20 दशलक्ष लिटर पाण्याची सहज चोरी होत आहे. अनधिकृत नळांबाबत प्रशासनात हवे तितके गांभीर्य नाही. शहराच्या गावठाण भागात सुमारे 96 हजार, तर हद्दवाढीत सव्वा लाख मिळकती आहेत. नळजोड मात्र 54 हजार आणि 37 हजारांपर्यंत आहेत. गावठाणात सार्वजनिक नळ आहेत, हद्दवाढीत नाहीत. त्यामुळे हद्दवाढीत मोठ्या प्रमाणात अनधिकृत नळजोड असण्याची दाट शक्‍यता आहे. 

हेही वाचा.... मोबाईल क्रमांक पोर्ट करायचे नवीन नियम 

आकडे बोलतात... 
(शहर व हद्दवाढ मिळून) 
एकूण मिळकती ः 2,16,750 
एकूण नळजोड ः 91, 866 
नळजोड नसलेल्या मिळकती ः 1,24,884