शिर्डी : ""कॉंग्रेस नेते मल्लिकार्जुन खर्गे यांच्या भेटीबाबतचे वृत्त हे माझ्या बदनामीचे षड्‌यंत्र आहे. कॉंग्रेसमध्ये प्रवेश करण्याच्या चर्चाही निरर्थक आहेत. या विरोधात मी गुन्हा दाखल केला आहे. कॉंग्रेस सोडल्यानंतरही आमच्या सुख-दुःखाची चिंता करणारे मंत्री बाळासाहेब थोरातच दोन वर्षांपूर्वी भाजपमध्ये प्रवेश करणार होते,'' असा आरोप आमदार राधाकृष्ण विखे यांनी आज पत्रकारांशी बोलताना केला. 

हे पाहा पंढरपूरला जाणाऱ्या भाविकांवर काळाचा घाला 

विखे म्हणाले, ""यासाठी थोरातांनी दिल्लीत कोणाकोणाची भेट घेतली, त्यांची नावे आता आम्हाला जाहीर करायला लावू नका. कॉंग्रेसचे नेते खर्गे यांच्या न झालेल्या भेटीची चर्चा जाणीवपूर्वक सुरू करून मला बदनाम करण्याचा काहींचा हेतू आहे. या बदनामीकारक चर्चेच्या मुळापर्यंत जाण्याचा निर्णय मी घेतला आहे. कॉंग्रेसला मिळालेल्या यशात थोरातांचे कर्तृत्व शून्य आहे. त्यांना सर्व अपघाताने मिळाले आहे. विरोधी पक्षनेता म्हणून मी केलेल्या कामामुळेच राज्यात कॉंग्रेसला अच्छे दिन आले आहेत. मागील साडेचार वर्षे थोरात गप्प होते. कॉंग्रेसचा राज्यात पूर्णपणे फुटबॉल झाला आहे. कॉंग्रेसचे नेतृत्व राष्ट्रवादी आणि शिवसेनेच्या दावणीला बांधले गेले आहे.'' 

हेही वाचा इथं होतोय बेसुमार वाळूउपसा 

सत्तेवर येण्यापूर्वी या सरकारने सात-बारा कोरा करण्याचे आश्‍वासन दिले होते. मात्र, अटी-शर्तींमुळे महाविकास आघाडीच्या कर्जमाफीचा लाभ शेतकऱ्यांना मिळणार नाही. शेतकऱ्यांचा अपेक्षाभंगही झाला. मुख्यमंत्र्यांचा रिमोट कंट्रोल वेगळाच आहे. अवकाळी पावसाने नुकसान झालेल्या शेतकऱ्यांच्या मदतीबाबत कॉंग्रेस आणि "राष्ट्रवादी'चे आमदारही काही बोलायला तयार नाहीत. तुमचा सत्तेचा डाव चालू ठेवा; मात्र शेतकऱ्यांचा बळी देऊ नका, अशी कोपरखळीही विखे पाटील यांनी मारली. 

हे पाहा यशवंतराव गडाख यांना जीवनगौरव 

"त्यांनी थेट माध्यमांकडे जायला नको होते' 
जिल्ह्यातील भाजपच्या पराभूत आमदारांकडून होत असलेल्या आरोपांवर भाष्य करताना विखे पाटील म्हणाले, ""या संदर्भात संबंधितांनी पक्षाच्या नेतृत्वाकडेच भूमिका मांडायला हवी होती. पक्षाच्या आचारसंहितेचा विचार करून थेट माध्यमांकडे जाण्याची गरज नव्हती. याबाबत मी कधीही माध्यमांसमोर भाष्य केले नाही. आता आमच्या सर्वांच्याच मागणीवरून पक्षाचे नेते देवेंद्र फडणवीस यांच्यासमवेत मुंबईतील बैठकीत विस्तृत चर्चा झाली. नेमलेल्या समितीकडून येणाऱ्या अहवालावर निर्णय होईल.'' 

येथे क्‍लिक करा सहलीला कमी पैसे दिले म्हणून...