पाथर्डी: मरकजहून आलेल्या तालुक्‍यातील माणिकदौंडीतील व्यक्तीसह कुटुंबातील "त्या' बारा सदस्यांचे अहवाल "निगेटिव्ह' आले आहेत. माणिकदौंडीत शुक्रवारी दुपारी दिल्लीतील मरकजहून परतलेला एक तरुण आढळून आला. त्यामुळे तालुक्‍यात मोठी खळबळ उडाली.

हेही वाचा - अब कोई भुखा नही रहेगा

याबाबत नायब तहसीलदार पंकज नेवसे, तालुका आरोग्य अधिकारी डॉ. भगवान दराडे, पोलिस निरीक्षक रमेश रत्नपारखी, आरोग्य अधिकारी डॉ. अक्षय जायभाय यांच्यासह कर्मचाऱ्यांनी शुक्रवारी दुपारी माणिकदौंडीत संबंधित तरुणाच्या घरी जाऊन चौकशी केली होती. त्या वेळी या तरुणाने मरकजहून आल्याचे कबूल केले. त्यामुळे प्रशासनाने संबंधित तरुणासह त्याच्या संपर्कात आलेल्या बारा सदस्यांना शुक्रवारी दुपारी येथील उपजिल्हा रुग्णालयात कोरोनाची चाचणी करण्यासाठी दाखल केले होते.

रविवारी सायंकाळी त्यांचे अहवाल आले. त्यात ते "निगेटिव्ह' असल्याचे आरोग्य विभागाने जाहीर केले. मात्र, त्या सर्वांना पुढील चौदा दिवसांसाठी "क्वारंटाईन' करण्यात येण्याची शक्‍यता आहे. 
शनिवारी संबंधित व्यक्तीच्या संपर्कातील आणखी तिघांना जिल्हा रुग्णालयात पाठविण्यात आले होते. त्यांचे रिपोर्ट येणे बाकी असल्याची माहिती मिळाली.