पेठवडगाव - येथे विजयसिंह यादव चौकात आज दुपारी एकच्या सुमारास मालवाहू ट्रक व मोटारसायकल यांच्यात अपघात झाला. या अपघातामध्ये एक मुलगा व मुलगी ठार झाले. शुक्राणा मोहसीन शेख (१२), आरफान मोहसीन शेख (१०, दोघे रा. भादोले) अशी मृतांची नावे आहेत.

सुदैवाने या अपघातामध्ये त्यांचे आई वडील बचावले आहेत. वडील मोहसिन हारुण शेख (३५,) व त्यांची पत्नी रिजवाना (३०) हे जखमी अाहेत. त्यांच्यावर वडगावमधील खासगी रुग्णालयात उपचार सुरु आहेत. 

मोहसिन शेख यांचे भादाेले येथे हॉटेल आहे. ते कामानिमित्त वडगावला त्यांच्या मोटारसायकलवरुन (एम.एच.०९,सी.क्यू ५३०९) पत्नी, दोन मुलांच्यासह आले होते. ते विजयसिंह यादव चौकातून लाटवडेच्या दिशेने जाणार होते. मेन चौकात मालवाहु ट्रक ( एम.एच.०९, सी. ए ३१२४) हातकणंगलेहून बिरदेवचौकातून वळण घेऊन जात होता. यावेळी मोटारसायकलची धडक झाली व मोटारसायकलवरील चौघे ट्रकखाली सापडले. यामध्ये मुलगा आरफान यांचा जागीच मृत्यू झाला तर जखमी मुलगी रिजवाना उपचार सुरु असताना तिचा मृत्यू झाला. वडिलांच्या छातीला, हाताला तर त्यांच्या पत्नीच्या पायाला गंभीर इजा झाली आहे. पोलिसांनी ट्रक ताब्यात घेतलेला अाहे.