टिळकवाडी (बेळगाव) : हिरवाईने नटलेला व्हॅक्‍सिन डेपो सर्वांना साद घालत आहे. शंभर एकर विस्तीर्ण परिसरात पसरलेली झाडी आणि निसर्गरम्य ठिकाण असलेला व्हॅक्‍सिन डेपो सध्या फोटोशूटसाठी प्रसिद्ध ठिकाण बनले आहे. त्यामुळे शहरासह विविध भागातील युवक-युवती या ठिकाणी मोठ्या प्रमाणात गर्दी करु लागले आहेत. 

शहरातील टिळकवाडी परिसरात असलेल्या व्हॅक्‍सिन डेपोचा विकास करण्यासाठी गेल्या अनेक वर्षांपासून प्रयत्न करण्यात येत आहेत. स्मार्ट सिटी योजनेअंतर्गत त्या ठिकाणी ग्लास हाऊस उभारले आहे. डेपो परिसरात लहान चेकडॅमही बांधले आहेत. तेथे पाण्याचा साठाही होत आहे. तसेच सुमारे शंभर एकरात विस्तारलेल्या या भागात घनदाट झाडी आहे.

हेही वाचा -  मतदान यंत्रावरील उमेदवार चिन्ह अस्पष्ट असल्याने मतदान करण्यास काहीसा अडथळा निर्माण झाला

व्हॅक्‍सिन डेपोच्या चहूबाजूंनी संरक्षक भिंत असून सध्या हा परिसर तरुणाईला आकर्षणाचे ठिकाण बनले आहे. शालेय तसेच महाविद्यालयीन विद्यार्थी रविवारी व सुट्टीच्या दिवशी व्हॅक्‍सिन डेपोत फोटोशूट करण्यात गुंतले आहेत. स्मार्ट सिटी अंतर्गत रस्त्यांची कामे करण्यात येत आहेत. त्यावेळी पावसाळ्यात झालेला चिखल व माती व्हॅक्‍सिन डेपोत नेऊन टाकण्यात येत होता. याला काही निसर्गप्रेमींनी आक्षेप घेतल्याने हा प्रकार थांबला होता.

डेपोत वेगवेगळ्या प्रकारची असलेली झाडेही तोडण्याचे प्रकार अद्याप सुरुच आहेत. हिरवाईने नटलेल्या व्हॅक्‍सिन डेपोचे अस्तित्व टिकून राहण्याची गरज आहे. तरुणाईला साद घालणारा व्हॅक्‍सिन डेपोत शॉर्ट फिल्मचे चित्रीकरणही करण्यात येत आहेत. त्यामुळे एकंदरीत व्हॅक्‍सिन डेपो फोटोशूटसाठी प्रसिद्ध बनत चालले आहे. 

हेही वाचा - काळ आला होता पण वेळ आली नव्हती..! 

शहरात मोठ्या प्रमाणात झाडी असलेले ठिकाण म्हणून व्हॅक्‍सिन डेपोची ओळख आहे. मात्र या ठिकाणी अनेक वृक्ष उन्मळून पडले आहेत. तसेच काही भागात कचराही पडलेला असतो. याकडे संबधित विभागाने लक्ष देणे आवश्‍यक असून फोटोशूट करताना व्यत्यय येत आहे. फोटोशूटवेळी आपल्यामुळे इतर कोणालाही त्रास होणार नाही, याकडे लक्ष देणे आवश्‍यक आहे. 

संपादन - स्नेहल कदम