इस्लामपूर - मोठ्या कष्टानं व अनेकांना ओव्हरटेक करून इस्लामपूर विधानसभा मतदारसंघात शिवसेनेकडून अधिकृत उमेदवारी मिळवित गौरव नायकवडी यांनी उमेदवारी अर्ज दाखल केला. मात्र यावेळी त्यांचे चुलते वैभव नायकवडी यांनी  दांडी मारली. यामुळे डावीकडून उजवीकडे झुकलेल्या नागनाथ अण्णांच्या वारसदारांमध्ये फूट पडल्याचीच चर्चा सर्वत्र रंगली होती. 

कृषी राज्यमंत्री सदाभाऊ खोत, राहूल महाडिक, वैभव शिंदे, शिवसेनेचे जिल्हाध्यक्ष आनंदराव पवार, भीमराव माने, नगरसेवक विक्रम पाटील यांच्या उपस्थितीत आज गौरव नायकवडी यांनी शिवसेनेतून उमेदवारी अर्ज दाखल केला. हा अर्ज दाखल करण्यासाठी वैभव नायकवडी येणार का? अशी चर्चा सभेपुर्वी सुरू होती, त्याकडे अनेकांचे लक्ष होते. मात्र सभेचा समारोप झाला तरीही ते सभेच्या ठिकाणी फिरकले नाहीत. यावरून वैभव यांचा गौरव यांच्या उमेदवारीला पाठिंबा की विरोध? याबाबत उलटसुलट चर्चा सुरू झाली. गौरव हे शिवसेनेतून उभारणे हा वाळवा तालुक्यासह संपूर्ण जिल्ह्याला धक्का होता. त्यांच्या सेनेतील प्रवेशानंतर वैभव नायकवडी हे गौरव यांची पाठराखण करणार का? याबाबत उत्सुकता होती, मात्र वैभव नायकवडी यांनी या सभेला अनुपस्थिती दाखवून द्यायचा तो संदेश दिला, असे स्पष्ट झाले आहे.