टाकळी ढोकेश्वर: महाराष्ट्रातील जनतेने भारतीय जनता पार्टी व शिवसेना या युतीलाच कौल दिला आहे आमचा सूर्य योग्य ठिकाणीच उगवला आहे. अपघाताने सत्तेवर आलेल्यांच्या भाषणावर मी काय टीका करणार, असा टोमणा खासदार सुजय विखे पाटील यांनी उपमुख्यमंत्री अजित पवार यांना लगावला. तसेच त्यांनी महाराष्ट्रातील सत्तास्थापनेबद्दलही मोठा गौप्यस्फोट केला. त्यांच्या या विधानामुळे राज्याच्या राजकारणात चर्चा सुरू झाली आहे. 

अजितदादा काय म्हणालेले
दोन दिवसांपूर्वी कर्जत येथील सभेत उपमुख्यमंत्री अजित पवार यांनी विखे पाटील कुटुंबाच्या पक्षांतराबाबत भाष्य केले होते. ते तिकडे गेले आणि सूर्य इकडे उगवला, असे म्हणत मिश्कीली केली होती. त्याला डॉ. सुजय विखे पाटील यांनी आपल्या स्टाईलमध्ये उत्तर दिले. 

ढोकी(ता.पारनेर) येथे "खासदार आपल्या दारी" उपक्रमानंतर खासदार विखे पाटील यांनी पत्रकारांशी सवांद साधला. त्यावेळी त्यांनी वरील टोमणा मारला. 

काहीजण सत्तेसाठी आले

विखे पाटील म्हणाले, भारतीय जनता पार्टी पक्षात जे प्रवेश झाले ते सत्ता येईल, या अपेक्षेने झाले, मात्र आम्ही काँग्रेस पक्षाशी एकनिष्ठ राहिलो. जिल्ह्यात पक्षाची ताकद वाढवली. परंतु आम्हाला सुडबुदधीने लोकसभेचे तिकीट नाकारले. आम्ही सत्तेच्या पाठीमागे पळत नाहीत. जिल्ह्यातील जनतेने कायम आम्हाला स्वीकारले आहे. 

लोकसभेवेळी आम्हाला भाजपाने आधार दिल्याने आम्ही हा पर्याय स्वीकारला. अपवादात्मक आलेले सरकार टिकत नसते. कर्नाटकमध्ये काय झाले, आता मध्यप्रदेशमध्ये काय होणार आहे, हे आपण सर्व पाहणारच आहात, महाराष्ट्रातही सत्ता लवकरच येईल.

पंतप्रधान नरेंद्र मोदी यांची कामाची पद्धत अतिशय उत्तम आहे. सरकारी योजना समाजाच्या शेवटच्या घटकापर्यंत पोहचविल्या जाव्यात. या करीता खासदार आपल्या दारी उपक्रम राबवित आहोत, असेही डॉ. विखे पाटील म्हणाले.